جمعه - ۷ اردیبهشت ۱۳۹۷
خانه / مقاله / مانقورد پیئسی (بیرینجی پرده) / اوغوز گونئیلی

مانقورد پیئسی (بیرینجی پرده) / اوغوز گونئیلی

 

اؤنسؤز
قیرقیز یازیچی چنگیز آیتماتوف ون (گون وار عصره برابر)رومانین اوخودوقدا یازیلانلاردان چوخ یازیلانمایانلار گؤزه ده ییر. بیر میللتین میللی ده یرلرین گؤرمزدن گله رسن و ازه رسن او ده یرلر اورکلرده یاشاماغا باشلار،هله بو ده یرلرین ایچینده ماناس و دده قورقود کیمی بیر آغیرلیقلار وار ایسه اونلارا ساتاشماق،اوجا بیر قایایا داش آتماق کیمی دیر،قاییدیب آتانین اؤز باشینا دوشه ر.
(گون وار عصره برابر)رومانینین ایچینده بیر نئچه ناغیل دئیلیر کی بونلارین ان اؤنملیسی (مانقورد) دور.
بو ناغیل تکلیینده بیر رومان،فیلیم،ها بله پیئس اولابیلر.چونکو تورک دونیاسینین بوش بؤیرو ساییلیر، بو مانقوردلوق. زامان بویو ان بؤیوک ضربه لری تورک دونیاسی قارشی قارشیا قالدیغی دوشمانلاردان یوخ، بلکه اؤز ایچیندن چیخان مانقوردلاردان یئییب.اونا گؤره من بو ناغیلی بیر پیئسه دؤندورمه یی اؤزؤمه بورج بیلدیم.اونون هاردا نه زامان ایجرا الونماسینا هله لیک هئچ بیر فیکریم یوخدور .

 

مانقورد
(نایمان آنا چورک یاپیر صحنه بیر تندیر دامین گوستریر،راوی بیر گؤرونمز آدام کیمی ایچه ری گیریر)
راوی_
ایللر ایللر اؤنجه بؤیوک تورکوستانین گؤبه یی ساییلان قازاقیستانین توپراقلاریندا،چوخ آما چوخ وئریملی بیر دوز واریدی،اورایا ساری اؤزه ک دئیردیلر.قازاقلار ان اسکی زاماندان بری بو توپراق لاردا شنلیک و اسنلیک ایچینده یاشاییردیلار. بیر آرا بو یئرلره بیر سورو یابانجی قوزئی بؤلگسیندن قوناق کیمی گلدیلر.
قازاقلار بوتون تورکلرین قوناق سئورلیک عادتی اوزره ،ساری اؤزه ک اوتلاق لاریندا اونلارا یئر- یورد،مال – داوار- دولرینه ایسه اوتلاق وئردیلر.اما گئت-گئده بو یابانجیلار(ژان ژووان لار)چوخالماغا، دولایسیله زور دئمه یه باشلادیلار.ائله کی توققوشمالار،ووروشمالار آرایا گلدی. بو ساواشلاردا هردن قازاقلار هردن ده ژان ژووان لار اوستون گلیردیلر و اوستون گلدیکلری زمان قازاق گنجلریندن یئسسیر توتوب اؤزلری اوچون قول ائلیردیلر،ان قورخونجو دا قوللاری مانقورد لاشدیریردیلار.

(راوی چکیلیر بیر نفر عسگر قیلیغیندا ایچری گیریر)

عسگر_
نایمان آنا،نایمان آنا ساواش بیتدی، دوشمانی گئری پوسگورتدوک،چوخلو ایتگیلر وئردیلر ،ائله بیزلردنده……
نایمان آنا_
بس منیم اوغلوم؟ او نئجه اولدو؟اؤلدومو یوخسا؟
عسگر_
ساواشین سونوندا بیر ناقافیل اوخ گلدی، تاخیلدی ائلمانین چینینه،آتدان دوشه رکن آیاغی تاخیلدی اوزه نگی یه،آت کوووشدو اونو سوریه-سوریه دوشمان توپراقلارینا ساری آپاردی،ایکی گون هر یئری آختاردیق نه دیریسین تاپا بیلدیک نه اؤلوسون، نه ده آتیندان بیر خبر اولدو.

(نایمان آنا دیز چؤکه رک آغلادی و آغی دئمه یه باشلادی)

نایمان آنا_
قوزقون لارین پایی اولدو،چاققالار دیدیب داغیتدی، پاپاغیز یئره گیرسین آی کیشیلر، منیم اوغلوم شهید آتاسینین اؤجو اوچون ساواشا قاتیلمیشدی، شهیدی دؤیوش میدانیندا بوراخماق اولورمو،اوغلومون یا اؤلوسون یا دیریسین تاپیپ گتیرین.
دیری!؟هن یا اغلوم دیریسه؟ژان ژووان لارین الینه دیری دوشرسه.ای گؤیدکی تانری اوندا اونون جانینی آل مانقورد اولماقدانسا اؤلمه یی یاخشی دیر.
راوی_
ژان ژووان لارین قورخونج و انسانلیق دیشی بیر عمللری واریدی،توتدوقلاری یئسسیرلری منیمسه مک اوچون مانقورد لاشدیریردیلار.بئله کی اؤنجه یئسسیرین باشینی دیبدن قیرخیب، تزه سویولموش دوه نین بویون دریسینی یازیغین باشینا چکیردیلر.سونرا بوینونا قاندال کؤنده له سی ووروب اللرینی باغلاییردیلار سس هارایین ائشیتمه سینلر دئیه آپاریب اوزاق بیر یئرده بوراخیردیلار.ساری اؤزکین قیزمار گونشینین آلتیندا دری قوروماغا باشلاییب مانقوردون باشینا یاپیشاردی.ایکینجی گوندن یازیق مانقوردون توکلری اوزاناردی بیرآزی دریه باتاردی،بیر آزیدا قاییدیب ایچه ری دوغرو اوزاناردیلار.بو ایشکنجه یه دایانا بیلمه ینلر اؤلردیلر ،دایانانلاری بئش گون سونرا گدیب تاپاردیلار. بیر کیچیک اوشاق کیمی اولورموش ،هر بیرشی ین ایتیرمیش .
دیل،سوی،آنا،آتا هامیسین اونودورموش.ال قولونو قاندالدان قورتاریب صاحیبی نه دئسه یدی اونو ائدردی.

(نایمان آنا آغی دئییر)

نایمان آنا_
دوه دریسین باشینا گئچیردیب شعورون داغیداندا بالام هئی
گؤرونمه ز چنبر سنین گؤزلرینی قانلی یاشلا دولدوراندا بالام هئی
ساری اؤزک ایستی سینین توستو وئرمه ز اوجاغیندا سن یاناندا بالام هئی
گؤی دنده بیر دامجی دوشمه دی دوداغینین کؤزون باسا جان بالا
یئر اوزونه حایات وئرن گونشه سن کوفور ائتدین می جان بالا
گونشه ایشقلارین ان قاراسی سؤیله دین می جان بالا
عذاب لارین عذابیندان شکست بئینی توران سالان جان بالا
کئچمیشین ایزلری بوتون آنی لارین سولاندا بالام هئی
چابالایا چابالایا اؤز آنانی اونوداندا بالام هئی
راوی_
نایمان آنانین آغی لاری بوتون قازاقلار آراسیندا یاییلدی دولایسیلا دیرنیش گوجو آرتدی،بونا گؤره ژان

ژووان لارین باسقینلاری کسیلدی،آرالاریندا کئچیجی بیر باریش ساغلاندی گاهدان آرادا آل وئر بئله اولوردو .بیر گون نایمان آنانین قاپیسی چالیندی.
نایمان آنا_
کیمدی،قاپی دؤیه ن
چارچی_
منم تانری قوناغی

(نایمان آنا قاپی نی آچار)
نایمان آنا_
بویور، گه ل ایچه ری
(چارچی ایچه ری گیره ر نایمان آنا اونا چای چؤرک گتیره ر)
نایمان آنا_
هاردان گلیرسن،هاراگئدیرسن
چارچی_
گؤردویون کیمی چارچیام هر یئری گزه رم -توزارام بیر تیکه چؤره ک اوچون،گاوور ژان ژووانلارین ایچیندن گلیرم بیزیم ایگیدلر یاخجی جانلارینا قورخو سالیبلار.آما گلیرکن اورییم پارچالاندی بیر آغیر دوه سوروسو گؤردوم یانیندان کئچه رکن بیر چوبانی واریدی بللی دیرکی بیزیم کی لردن یدی،بئچارا مانقورد اولموشدو. واه واه نه ایگیدیدی، یازیق اوشاق نه آتاسینین آدین بیلیردی نه آناسینین.دانیشدیغیمیز دیلی بئله اونودموشدو گاوورجا دانیشیردی،یاخینلاشیب سوروشدوم به سنین کیمین-کیمسه ن یوخدو؟دئدی یوخ.من گئجه لر آیا باخارام بیری اوردا اوتوروب منیم تاییمدی اما بیز بیربیریمیزی ائشیتمیریک.
یئنه چوخ دانیشدیم هرشی اوچون چوخ ساغول گئتمه لی یم
(چارچی چیخار)
نایمان آنا_
یا منیم اوغلوم سا؟نه واختدی بو شوبهه نی اوریمده گیزله دیب ساخلامیشام داها بیر وولقان کیمی دیشاری پوسگوردو. من گرک او دوه چوبانین تاپام اوغلوم اولمادیغیندان آرخایین اولمادیقجا گؤزومه یوخو گیرمه ز.یولا دوشمه لی یم اوریمده بیر سس اونون اوغلوم الدوغونو سؤیله ر ائله بو گئجه قورتارمادان نایمان لار یوخودایکن آغ مایانی مینیب اوغلومون دالی جا گئتملی یم بیر آز سویلا چؤرک آغ مایانین سوتویله منه یئته ر.شافاغین قیلینجی قارانلیغین باغرین سؤکمه دن گره ک گئده م هئچ کیم بیلمه مه لی،هامی منی مزمت ائیله ر،دئیه رلر اوغلون ساغ قالیب سا ایه ر او ایندی بیر مانقورد.مانقورد نه دیل بیله ر نه آتا -آنا نه ده ائل- اوبا تانییار،اونو آختاریب تاپماغین نه ایشه یارار.آما من اونو تاپمالییام ، بیر یولداشیم آغ مایانین گوجونه گووه نیرم یئری گلنده قاچیشینا هئچ بیر آت بئله چاتا بیلمه ز.

آردی واردیر…

بیشتر بخوانید

در سفر تبریز،رئیس جمهور با کلمات بازی کرد !/ حسن راشدی

حسن راشدی : ۵ /۲/ ۱۳۹۷ رئیس جمهور کشور آقای روحانی روز سه شنبه ۴ …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *