جمعه - ۷ اردیبهشت ۱۳۹۷
خانه / آذربایجان / من بو ملتین گله‌جه‌ییندن قورخورام / محمد رحمانی فر

من بو ملتین گله‌جه‌ییندن قورخورام / محمد رحمانی فر

 

️بیر زامان‌لار سئوگی، بیزیم اوچون قوتسال (مقدس) ساییلاردی. بیر قیزی سئودیییمیزده اوندان اؤترو جانیمیزدان بئله، کئچمه‌یه حاضیر اولاردیق. سئوگی دئدیییمیزده، لاپ بؤیوک آرزیمیز، سئوگیلیمیزین موتلولوغو ایدی. بونا گؤره، سئوگیلیمیزین باشقا بیری ایله داها موتلو اولا بیله‌جه‌یینه اینانا بیلدیییمیزده، حتی اؤزوموزو قیراغا چکیب، “تکی یاشاسین سئوگیمیز، تکی یاشاسین سئوگیلیمیز” دئیه، اونا اوغورلو گله‌جک‌لر آرزیلایاردیق.

ایندی بیزیم باشیمیزا نه‌لر گلیب؟ نئجه اولار سئودییین بیرینی اله گتیره‌بیلمه‌دییینده اونا آزار یئتیره‌سن؟ اونون گول جمالینی آسیدله یاندیراسان؟! بو مودور سئوگی؟ هارادا قالدی اسکی سئوگی‌لر؟ هارادا قالدی اینسان‌لیغیمیز؟ دوغرودان بیز هارا گئدیریک؟ بو آجی اولای‌لار نه‌یین گؤسترگه‌سی ساییلیر؟

اینانیرام، گلیشمیش اؤلکه‌لر تکجه تئکنولوژی باخیمیندان دئییل، بوتون باخیم‌لاردان گلیشمه‌لی‌دیرلر. توپلومدا بوتون قوروم‌لار بیربیرینه باغلی‌دیرلار. اقتصادی باخیمدان گلیشه بیلمه‌ین بیر توپلوم ادبیات باخیمیندان گلیشه بیلمز، ادبیات باخیمیندان گلیشه بیلمه‌ین بیر توپلوم ایسه اخلاقی، اقتصادی، سیاسی، انسانی باخیم‌لاردان گلیشه بیلمز.

بیر گون، بیزلر سئوگی درسینی بؤیوک نظامی کیمی، اوستاد شهریار کیمی، آشیق علسگر کیمی داهی‌لریمیزدن آلیردیق. آنجاق، بوگونکو گنج‌لریمیز نئجه؟ یاییملانمیش کیتاب‌لارینین ساییسی ایکی یوز جیلده چاتا بیلمه‌ین بیر ملتدن، بوندان آرتیق گؤزله‌مک اولار می؟

بلکه بو سؤزوم چوخ‌لارینا آجی گله، آما بیزیم توپلوموموز داغیلماغا دوغرو گئدیر. اقتصادی بینؤوره‌لری داغیلمیش بیر توپلومون، ادبیاتی دا داغیلار، انسانلیغی دا داغیلار، اخلاقی دا باتار. هاردا قالدی بیزه یاشاییش درسی وئرن اؤیرتمن‌لر، یازیچی‌لار، شاعیرلر، آشیق‌لار، صنعتکارلار؟! هئچ اونلاری دینله‌ین بیری وار می؟ یوخسا هامی تلگراملاردا، سانال دونیالاردا، ماهواره‌لرده، تیلویزیون‌لاردا خشونت یایان وئرلیش‌لرله باشینی قاتیب؟ تیلویزیون‌لاردا گئجه-گوندوز نیفرت، خشونت هابئله جینایتین یاییملانماسینی ایزله‌ین بیر ملت‌دن نه گؤزله‌مک اولار؟

سایین قلمداش‌لاریم، سئویملی یولداش‌لاریم، منی قیناماسایدینیز “بیزیم هامیمیز سوچلویوق” دئیَردیم. آنجاق، سیز ده حاقلی اولا بیلرسینیز. سئلبریتی‌لرین بدن‌لرینین اوج بوجاغینا، نئچه‌نجی ارلریندن بوشانیب نئچه‌نجی اره گئتمه‌لرینه، حتی ایت-پیشیک‌لرینین یئییب ایچدیک‌لرینه بیر یازیچی‌نین، بیر دوشونرین سؤزلریندن داها آرتیق اؤنم وئرن بیر ملت‌دن نه اومماق اولار؟

سؤزلوک:
موتلولوق: سعادت اوغورلو: سعادتمندانه اسکی: قدیمی گؤسترگه: نشانه، اشاره
اولای: حادثه، پدیده گلیشمیش: توسعه‌یافته قوروم: نهاد توپلوم: جامعه، اجتماع
بینؤوره: تمل، بنیان دینله‌مک: قولاق آسماق، مخاطب اولماق وئرلیش: برنامه
یاییملاماق: پخش ائتمک سوچلو: گناهکار اؤنم:اهمیت دوشونر: متفکر

@azadliq

بیشتر بخوانید

زبان من چونان زیبایی خفته از خواب برمی‌خیزد / ایواز طاها

هنگام انتشار مجله‌ی “یول” دو کَس بلای جانم شده بودند: محمدحسین شهریار و جلیل محمدقلی‌زاده. …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *