سه شنبه - ۳۰ مرداد ۱۳۹۷
خانه / مقاله / ائرمنی کیشیشی و تۆرک آخوْندۇن فرقی حاقدا / جلیل محممدقۇلۇزاده

ائرمنی کیشیشی و تۆرک آخوْندۇن فرقی حاقدا / جلیل محممدقۇلۇزاده

 

“ایراوان قۇبئرنیاسیٛندا بیر کند وار ایدی: آدی سامانلیٛقدیٛر.کندین جاماعاتی یاریٛیا قدر ائرمنی و یاریٛسیٛ مۆسلماندیر.
یای فصلی ایدی. اۇجا آتیٛن اۆستۆنده اوْتۇدۇب‌‌‌‌ کندین آلچاق دیوارلاریندان حَیَتلرین هامیٛسیٛنیٛ گؤرۆردۆم.
حَیَتین بیرینده بیر ائرمنی اۇشاغیٛ آغاجیٛن کؤلگه سینده اوْتۇرۇب‌ کیتاب اوْخۇیۇردۇ.
بیر حَیَتده اوْن ایکی_ اوْن اۆچ یاشیندا بیر مۆسلمان اۇشاغیٛ پیشییین قۇیرۇغۇنا ایپ باغلاییٛب حَیَتین اوْ طرفیندن بۇ طرفینه قاچیٛردیٛ و پیشیک‌ میٛزیٛلدایا_میٛزیٛلدایا اۇشاغییٛن دالیٛ_دالیٛ حرکت ائدیردی.
حَیَتین بیرینده بؤیۆک تۇت آغاجیٛنیٛن گؤلگه سینده بیر نئچه ائرمنی اوْتۇرۇب چؤرک یئییردیلر.
کئشیش آیاق اۆسته دۇرۇب ساغ الینی یۇخاریٛ قوْزاییٛب دانیٛشیٛردیٛ.

ایسته ییردیم کئچیب گئدم، همین کئشیشدن بیر سؤز ائشیدیب آتی ساخلادیٛم.
کئشیش اۇجا سس ایله دئدی: حایرئنیق، حایرئنیق، حایرئنیق (“حایرئنیق ائرمنی دیلینده “وطن” دئمکدیر).
چۆنکی من ائرمنینین دیلینی باشا دۆشۆرم، بیر قدر دایاندیٛم کئشیشین سؤزلرینه قۇلاق آسام.

بۇ حینده کۆچه نین بیر طرفیندن مۆسلمان دانیٛشیٛغیٛ ائشیتدیم. آتیٛ قاباغا سۆرۆب گؤردۆم کی، کۆچه آیریٛمیٛندا دیوارین کؤلگه سینده دؤرد مۆسلمان اوْتۇرۇب.
بۇنلاریٛن بیری آخۇند موْللا قۇربانقۇلۇ ایدی.
بۇ آخۇندۇ من چوْخدان تانیٛییٛردیٛم.
موْللا قۇربانقۇلۇنۇن الینده بیر کیتاب وار ایدی.
موْللا کیتابیٛ اوْخۇیۇردۇ و کندلیلر دیققتی_تام ایله قۇلاق آسیٛردیٛلار.
کئشیش اۇجا سسله کندلیلر بۇ سؤزلری دئییردی:
_ائرمنی میللتینین دۆنیادا اۆچ سئوگیلی بالاسیٛ وار: “وطن”، “میللت”، و”دیل”.

کئشیشین بۇ سؤزلریندن سونرا قۇربانقۇلۇنۇن سسی گلدی.
موْللا کیتابدان بۇ سؤزلری اوْخۇیۇردۇ: “بابی_هفتۆم (یئددینجی فصل). اگر بیر شخص یاتا، یۇخۇسۇندا حَجَمَت گؤره، همین شخص دۆنیادا هئچ بیر بلایا و نوْخوْشلۇغا گیریفتار اوْلمایاجاق”.

کئشیشن بئله سسی گلیردی:
“ای منیم‌ ائرمنی قارداشلاریٛم، دۆنیا خالف اوْلۇلاندان ایندی یه کیمی ائرمنی طایفاسیٛ مۆختلیف میللتلرین جؤور و ظۆلمۆنه دۆچار اوْلۇب.
قاریٛشقالار آت نالیٛنیٛن آلتیٛندا ازیلن کیمی قۆووتلی و‌‌‌ بی مۆرۆووت طایفالاریٛن یۇمرۇغۇنۇن آلتیٛندا پامال اوْلۇبلار: بۇنیله بئله ائرمنی اؤلۆم حالیٛندا جان وئره_وئره یئنه دئییب: وطن، وطن، میللت، حایرئنیق!”
“ای منیم قارداشلاریٛم، نه قدر کی میللت، دیل و‌‌ وطن یوْلۇندا فدا اوْلماغا بیز قادیریک، جَمی دۆنیانیٛن طایفالاریٛ مۆتتفیق اوْلۇب بیزیم اۆستۆمۆزه حۆجۇم گتیررلر، بیز یئنه اوْنلاریٛن قاباغیٛندا دایانیٛب دیلیمیزی و وطنیمیزی مۆحافیظت ائده بیلجییک.
یاشاسیٛن وطن یوْلۇندا فدا اوْلان ائرمنی میللتی!
یاشاسیٛن میللت اۇغدوندا شهید اوْلان قارداشلار! گئتسه (یاشاسیٛن)، گئتسه حایرئنیق!”

موْللا قۇربانقۇلۇ کندلیلره دئییردی:
_ آغاجیٛن آلتیٛندا، سۇیۇن قیٛراغیٛنا بؤول ائتمک یاخشی دئییل، چۆنکی همزاد، اجیننه، شیاطین اینسانا ضرر یئتیرر.
چاهارشنبه، شنبه و تک گۆنۆ قبریستانا و حاماما جَم اوْلۇب قوْناقلیٛق ائدرلر و‌ همین گۆنلر بۇنلاریٛن بایرامیٛدیٛر.
اینسانیٛ گؤرسلر، ضرر یئتیررلر. اگر بیر کسین بئله بیر قضا باشیٛنا گلسه، دۇرماییٛب گلسین منیم یانیٛما، واخت ایکَن اوْنا “هفت حصر” دۇعاسیٛ یازیٛم …”

بیشتر بخوانید

آدلیم علی تبریزلی نین تانیتیمی / سعید موغانلی

آذربایجانین چاغداش یازیچی، تنقیدچی و شاعیرلریندن بیری ساییلان «علی تبریزلی، حسین آغااوغلو» ۱۳۰۸-جی ایلین تیر …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *