خانه / مقاله / خمینی ایله واریثین صؤحبتی؛«ایران حزب‌الله زیندانیندا» رومانیندان ۳ / ائل اوجا آتالی

خمینی ایله واریثین صؤحبتی؛«ایران حزب‌الله زیندانیندا» رومانیندان ۳ / ائل اوجا آتالی

(اوچونجو بؤلوم / کؤچوره ن : ا.دیلمانلی)

(کبین مهریه سی کیشی طرفیندن اعدام اولونموش قیز عایله سینه اؤده نیلدیی کیمی، هم ده قیز عایله سینین بورجو ایدی کی، کبین کسمیش ملانین حاقی اولاراق، بئش مین تومنلیک شیرنی آلیب، دوستاقدا ایشچی لره اونو پایلاشسین.)

منطیقه! سؤیکنمیش عاغیل ،هر شئیی اوستاجاسینا حل ائتمه باجاریقلیدیر. آما عاغیل اینسانی حالی اؤزوندن قیراغا آتارسا، قارشیسینداکینین روحون، اینسان اولدوغون نظره آلمازسا، اوندا هر شئیی اؤز منافعی یولونا یؤنلدر. باکیره قیزلاری حاق طرزیسینده اؤلچن ایمام خمینی اونلارین جهیز حاققی اولان مهریه نی مین اوچ یوز تومن مبلغینده اولدوغونو منتظریه خاطیرلادیب علاوه ائتدی کی :

-هئچ کسین حاققی هئچ کس ده قالمامالیدیر! اونوتما کی، مهریه قیزا جهیز حاققی و هم ده آناسینا سود حاققی کیمی وئریلیر.
ائوله نن کیشی گرکدی کی، نیکاح ائتدیینین نیکاح توتارینا قیرجانیب ،اونو کسمه یه.
اگر کیشی و قادین آراسیندا کبین و یا صیغه اوخونوبسا، اونلارین آرالاریندا محرملیک وارسا ،دئمک، قادینین حاققی وئریلمه لیدیر. دینیمیز حلال لیق اولماسینی بویورور.

-آغا ،آخی چوخ حال لاردا کافیرلرین جنازه سی عایله لرینه قایتاریلمیر…
-اولسون! آما حلال لیق اولاراق جهیز حاققی اؤده نیلمه لیدیر. بو آللاهین بویروغو ،قرآن کریمین یازیلی گؤستریشیدیر. بیز بوندان قاچا بیلمه ریک.
منتظرینین سینسییب اوتورماسیندان آغا دویدو کی، او صؤحبتی بیتیرمک ایسته میر، یا آغانی قراریندان دؤندرمک دن اؤتری نه سه یوموشالدیجی بیر یول آختاریر ،یادا یئنی هر هانسی بیر ایسته یینی دئمک اوچون ،اویغون فرصت‌ گزیر.

منتظرینی مات ائدیب یولا سالماق مینوالی ایله ،آغا صؤحبتین سونونا بئله یئکون ووردو :
-جننتی اونلارا پئشکئش ائدن اولمایاجاق.
-ساتین آلماق ایسته سه لر بئله؟
-آللاهسیزلار بو شانسی ایتیریبلر.
-آللاهسیز قادین اولسا؟

منتظری اؤزوده حیسس ائتمه دن،سسی آغانین سسیندن یوکسک چیخدی ،بونو آغانین، اونو قاش آلتیندان سرت باخیشلا سوزمه سیندن سئزمک چتین دئییلدی.

-بیز آللاهسیز لاری جینسه بؤلموروک ،اینامینا گؤره اونلارا ده یر وئریریک! بو دفعه قاشلارینی یوخاری دارتیب واریثینه بوتؤو گؤزلرله نظر سالان آغا، خیمی – خیمی گولومسندی.
سانکی ایسلام اینقیلابینین اصل غلبه سی، واریثینه توتارلی جواب وئریب، اونو قاندیرماق ایدی.

-آخی، جننت آنالارین آیاغی آلتیندا دیر!
-آللاهسیز الی گؤیدن، آیاغی یئردن کسیلندیر! گؤی له یئر آراسیندا چاره سیز بوراخیلمیش آتئیست قیزلارین ایمانلی آغاسیندان، اونلارین دردینه درمان آختاردیغینا گؤره، اوره یینده اؤزونو یامانلایان منتظری ،اوزون قارا خالاتینین (عباسینین) ال – اته یینی ییغیب، آغانین غضب لی باخیشلارینی تزه دن گؤرمک عذابیندان اؤزونو قورتارماقدان اؤترو ،باشینی سینه سینه ائندیریب، آغایا باش ایه- ایه قاپیدان چیخدی.

منتظری نین فیکری قوجا ایمامین آمال باخچاسیندا، گؤیرمه یینه – گؤیردی، آما چیچک کیمی یوخ ،تیکانلی قانقال تک. ائله بو قانقالین تیکانلاریندان بیرینجی زده آلان، اونون اؤز اینامی اولدو کی، او، آیت الله دان چیمچیندی و داها صؤحبتی اوزانماییب تئز آیاغا قالخدی.

بئله لیکله ده ،مثبت رول حسرتی ایله، یؤنتمن(کارگردان) خواهیشه گلن، اورتا سویه لی آرتیست اؤزو ده بیلمه دن ان قددار صحنه نین یارانماسی اوچون قورولوش وئرمیش اولدو.
ایشینی بیلن یؤنتمن ،اورتا سویه لی اویونجویا هئچ زامان باش رولو وئرمز. ائله جه ده منتظری آرزولادیغی رولو اوینایا بیلمه دی.

۸۸ ین یاییندا ،صحنه لشدیریلن تاماشا پرده سینین سالینماسینی گؤزله مه ین واریث، او آخشام ائوینه گئدیب مقدس کیتابی مئشین آراسیندا جا اؤز اوتاغیندا قرآن رحلینینن اوستونه قویدو. الینی اوزالدیب کیتابین آراسینی آچماق ایسته یه نده، بیردن – بیره الی اسدی.
نه دوشوندوسه، الی کیتاب چاتمامیش یاری یولدان جا اونو قایتاریب اوزونو یانا توتوب، یؤنونو چئویریب اورادان اوزاقلاشدی.

ایمام خمینی نین گوناهی لیاقت له، یوماقلا باغلی یئنی تاپینتیسینین دوستاقلاردا تطبیقی اوچون ،ائله او گون ایرانین بوتون دوستاقلارینا یازیلی سند شکلینده امر گؤندریلدی.
امرین ایجراسینا ایسه ،آخسامادان سحری، دان یئری آغارماغا باشلایاندا ،یئنی ایش گونونون ایلک آنیندان عمل ائتدیلر.

دوستاقلاردا قانونی تجاووز اوچون، ایمام طرفیندن وئریلمیش دینی ایزینی – کبین حاققینداکی امری، بیر قایدا اولاراق تکجه ملا اوخوموردو. بونو دوستاق داکی مؤمن، حتی دوستاق داکی دوستاق باشچیلاری دا یئرینه گتیرمه یه باشلادیلار.
چونکو دوستاق یاشچیلارینین چوخو ملا کؤکنلی مامورلاریدی .

کبین مهریه سی کیشی طرفیندن اعدام اولونموش قیز عایله سینه اؤده نیلدیی کیمی، هم ده قیز عایله سینین بورجو ایدی کی، کبین کسمیش ملانین حاقی اولاراق، بئش مین تومنلیک شیرنی آلیب، دوستاقدا ایشچی لره اونو پایلاشسین.
مهریه خرجینی ایسه دؤولت اؤزو اؤدویردی. چونکو اعدام اولونموش قیز ،دؤولت ایشچیسی ایله ائولندیریلیردی.

خمینی دئمیشکن :هر شئی عدالت گؤزو ایله بیچیلیب، حق تره زی سینده اؤلچولموشدو. ائله بونون سونوجوندا دا اسکیک اولانلارین اوزه رینه علاوه اولونوب، آرتیق اولانلارسا، یونتانیب قیز و تره زینین مال گؤزونده پرسنگ لر برابرلشمیشدی.
قانون (قرآن) کیتابیندا یازیلمیشدیر کی :

«ای مؤمن لر، استفاده ائتدیینیز قادینلارین مهریه سینین میقدارین، اؤز آرانیزدا آنلاشین»
آما نه یازیق کی، بو آنلاشمادا قیز طرفینین اویو ،اساس ساییلمادیغی اوچون، بیچن ده – اؤلچن ده، کیشی ائوینین آدامی ایدی…

دوستاقدا نیکاهی کسیلن قیزلارسا ،دوستاق ایشچیلری آراسیندا، او گوندن بری ظارافات یانا اینقیلاب گلینی آدلانماغا باشلاندی.

بیشتر بخوانید

نقدی بر ایده فدرالیسم در ایران

“باور به گفته هایت فریبکاری تو را کارساز می کند، این بار به گونه ای …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *