خانه / حقوق بشر / خمینی ایله واریثین صؤحبتی؛«ایران حزب‌الله زیندانیندا» رومانیندان / ائل اوجا آتالی

خمینی ایله واریثین صؤحبتی؛«ایران حزب‌الله زیندانیندا» رومانیندان / ائل اوجا آتالی

(ایکینجی بؤلوم / کؤچوره ن : ا.دیلمانلی)

(قیز اوشاقلارینی وئرک پاسدارلار باکیره لیینی آلسینلار،سونرا اعدام ائتسینلر. بیزده گوناه دان آزاد اولاق، آللاهیمیز یانیندا اوزو قارا قالمایاق. سونرا نیکاحلانیب اعدام اولونموش قیزین جنازه سی عایله سینه وئریلرکن، اونون مهریه سی ده عایله سینه، جنازه سی اوسته وئریلر.)

-پاسدارلارین یالنیش لیق اوزره اؤلدوردوک لرینین قانی باتیر.
– سونرادا علاوه ائتدی کی :بعضا یالنیشلیک اوزره گوناهسیز آداملاری دا اعدام ائدیریک.
-گوناهسیز ؟..
-هه، آغا، گوناهسیزلاری سوال ائدیرم.
-اونوتموسان ،آغای شیخ صادیق خلخالینین بو مساله نی حل ائتدیینی؟

واریث گؤزلرینی قییب اوزاق بیر نقطه یه باخدی. خلخالینین زینداندا ناحاق اؤلن لرله باغلی مساله نی نئجه قانونی حل ائتدیینی خاطیرلایا بیلمه دی. قوجا ایمام سا حیسس ائتدی کی، واریثی اونون نیه ایشاره ائتدیینی آنلامادیغی اوچون ،برکه – بوشا دوشوب چتینلیک چکیر. ائله اونا گؤره ده نه یه ایشاره ائتدیینی آچیب نیشانگاهی اؤز الی ایله گؤستردی :

-آغای خلخالی فیتوا وئریب کی، کیمسه یالنیشلیقلا اعدام اولونورسا ،یئری جننت دیر.
دئمک اوزولمه یه نه دن یوخدور. کیمسه یالنیشلیقلا اؤلدورولورسه ،جننت لیک اولاجاق.

آیت الله خمینی خلخالینین گوناهسیزلارا جننت موشدولوغونو خاطیرلاییب گولومسه یه رک واریثینه سوال ائتدی :

-مگر بو آزدیر؟

-بونون یئترلی موکافات اولدوغونو دوشونمورم… – او، حکومتین گوناهینی آزالتماغا چالیشیب یوللار آختاردیغی بیر زاماندا ایمام :
-اونو بئله ائده ک…
-دئییب، سؤزونه آرا وئرن ایمام، الینی آغزینین اوستوندن آشاغی ،دوز ساققالینین اوجونا قدر چکیب ،دوم آغ ساققالینی یاواشجا سیغاللادی :-اونلارا اینقیلاب شهیدلری آدی وئره ک، یازیقدیلار قوی قانلاری باتماسین.

سئوینجه دولاراق بیغالتی گولن ایمام ،بیر نئچه دفعه باشینی ییرغالادی.
آیت الله منتظری حیسس ائتدی کی، بو دقیقه اؤلکه ده آپاریلان داخیلی سیاست دن راضی اولان قوجا ایمام، قان عشقین دن جوشا گلیر.
بئله اولان حالدا ،اونو اینصافا گتیرمک چتیندیر. بو یئرده فیکیرلشدی کی، بس نئجه ائتسین اعدام لارین سایین آزالتسین.

-آغا ،مقدس کیتابیمیز قورآن دا یازیلیب کی، «قیز اوشاقلارینی اعدام ائتمک ،اؤلدورمک گوناهدیر». اوندا امر ائدین قیز اوشاقلارینین اعدامینی ساخلاسینلار.
سؤزونو بیتیرن واریث ال آتدی کیتابی واراقلاییب دوغرولاماق اوچون ایماما بو باره ده یازیلمیش آیه نی گؤسترسین و بونونلادا اؤز سؤزونه گوج وئرسین. هم ده بونونلا دوشونجه سینده دایانیقلی اولوب ایماما ائتکی بوراخسین.
آنجاق ایمام خمینی نین گؤزلرینی قییب اونا زیلله مه سیندن آغلی بیر شئی کسمه ین واریث الینی کیتاب اوزه رینده جه ساخلادی.

-سن حاقلیسان اوغول. قیز اوشاقلارینین اؤلدورولمه سی گوناهدیر….
فیکرینین بئله تئز جوجرمه سینه سئوینن منتظری، واختی بادا وئرمه دن دیللندی :

-اونلارین جزاسین یونگول لشدیرمک ده اولار. میثال اوچون اعدامی اوزون مدت لی حبس له عوض ائدرلر، قورتاریب گئدر.
قیزلار ائتدیکلری گوناه اوچون ،جزایا بو شکیل ده چاتارلار.
-یوخ، کافیر کافیردیر…
کافیری جینسه بؤلمه یین اؤزو قباحت دیر.
آرواد اولسون یا کیشی، نه فرقی؟ سؤز مقدس اینامین اینکاریندان، اونا قارشی موحاریبه اعلان ائدن موحاریب لردن گئدیر. گرک کافیر جزالانسین. – تئز ده اوستوندن آرتیردی کی :
– اوندا بئله ائدک، قیز اوشاقلارینی وئرک پاسدارلارا…

گؤزلرینی دؤیه – دؤیه خمینینین آغزیندان نه چیخاجاغینی صبیرسیزلیکله گؤزله ین واریث ،اونون سون تکلیفینه یئریندن قورجالاندی. صبیرسیزلیکله باغلی تؤهمتی هله ده جانیندان چیخارا بیلمه دییی اوچون ،اؤزونو آزجا دا اولسا ،دؤزمه یه ساخلاشدیردی . آما آغانین سؤزونه دوام ائتمه دیینی گؤروب دیللندی :

-آغا، دین ده بویورورلار کی، تجاوز گوناهدیر! بونو بیله – بیله گوناهامی باتاق؟
-سن نیه بئله یالنیش فیکیرلره جومورسان ؟کیم دئییر کی اونلارا تجاوز اولونسون؟

سودان چیخمیش بالیق کیمی، هاواسی چاتمایان واریث، آغزی آچیق قالیب، سؤز تاپمیردی کی، آغاسینا دئسین. آنجاق بیر نئچه دفعه بوغازیندا آ… سؤزجویونو قاینادیب بیشیردییی اوجادان میزیلداماغیندان حیسس اولوندو.
آنجاق « آ » ایله باشلایان هئچ نه تاپا بیلمه دن دئدی :
-بیز گرک دینیمیزین اینسانلارا مرحمت و باغیشلاماقلا باغلی اینسانی فیکیرلریندن فایدالاناراق ،محبوسلارا رحم ائدک.

بیز بوتون بونلاری قانونو ائده جه ییک!
-نئجه؟
-دونیادا حللی اولمایان سورون یوخدور!
-باشینی اونا ساری اوزادان ایمام، سسینه اؤزه ل آهنگ قاتاراق، واریثینی قورخودان آزاد ائتمه یه چابا گؤستردی.

-بیر اونا قالیب کی، آدام عاغلین ایشلتسین. – بونو دئیرکن ایمام، ساغ الین قالدیریب باشینداکی آغ عمامه یه یاواشجا ووردو.
-زیندان داکی اؤلوم حؤکمو اوخونموش کافیر قیزلارین نیکاحی ،پاسدارلارا اوخونار، قورتاردی گئتدی…

بیر آنلیغا آغلی چاش – باش قالمیش منتظری، آغاسینین زینداندا کافیر قیزلا ،ایسلام اینقیلابینین صادیق کئشیک چیسینین کیشی پاسداری ایله نیه ائولندیرمک ایسته دیینی آنلامادی. آما بو یئرده نقطه نی یئنه ایمام قویدو.

-قیز اوشاقلارینی وئرک پاسدارلار باکیره لیینی آلسینلار ،سونرا اعدام ائتسینلر. بیزده گوناه دان آزاد اولاق، آللاهیمیز یانیندا اوزو قارا قالمایاق.
-سؤزونو بیتیررکن آیت الله خمینی، باشینی گؤیه توتوب، گؤزلرینی بیر آنلیق ائوین تاوانینا (سقفینه) زیلله ییب آللاها ایشاره ائتدی.

-بس، سونرا؟
-سن ایشی بو قدر چتین توتما…
سونرا نیکاحلانیب اعدام اولونموش قیزین جنازه سی عایله سینه وئریلرکن، اونون مهریه سی ده عایله سینه، جنازه سی اوسته وئریلر.
باخ ،بئله اولاندا کیمین – کیمه بورجو قالیر کی؟

بیشتر بخوانید

گزارش تفصیلی “ابراهیم نوری ” دانشجو و فعال ملی آزربایجانی محبوس در زندان ائوین از وضعیت این زندان

اؤیرنجى : ابراهیم نوری  دانشجو و فعال ملی آزربایجانی محبوس در زندان ائوین با تنظیم …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *