خانه / آذربایجان / «اندیشه نو» و «تک درخت»تورکجه کتابلارین ساتیش مرکزلرینی باغلادیلار! (۲) / اکبر آزاد

«اندیشه نو» و «تک درخت»تورکجه کتابلارین ساتیش مرکزلرینی باغلادیلار! (۲) / اکبر آزاد

«اندیشه نو» و «تک درخت» تورکجه کتاب ساتیشی مرکزلرینین باغلانماسینا اساس دلیل بونو اعلان ائدیبلر کی، گویا مجوزسیز کتابلار چاپ ائدیبلر، ساتیبلار! بو دلیلی ائشیتدیکده بیر مطلبی خاطرلادیم:

نئچه ایل اؤنجه، پوست اداره سینین ایشچیسی بیر احضاریه قاپیمیزا گتیردی! «احضاریه» «ایران سلاحلی قوه لرینین قضایی تشکیلاتی» طرفیندن ایدی! منی بیر مطلع(نظرلرینده اولان مسئله باره سینده خبردار و معلوماتی اولان)شخص کیمی چاغیرمیشدلار کی، بیر سیرا ایضاحات وئرم ! چوخ تعجب ائتدیم ! مین–بیر خیال دوشدوم:

من له ایران سلاحلی قوه لرینین نه ساز-بازی؟

من کی، سلاحلی قوه لرله بیر آلیش-وئریشیم یوخدور؟!

منی نه اوچون چاغیریبلار!؟ و…

وعده تعیین ائتمیشدیلر! هفته گونلرینین بیرینده گون اورتادان سونرا ساعت بیرده(۱۳ده) گئتمه لی ایدیم! گون و ساعتی نظرده توتوب؛ دوز وقتینده، بیلدیریلمیش آدرئسده حاضر اولدوم!

بو چاغیریشین(احضاریه نین) ماجراسینی  ۱۳۹۲-جی ایلین آنا دیلی گونو مراسیمی ایله ایلگیلی، منیم و سایر اوچ دوستومون علیهینه حاضرلانمیش اتهامنامه ده(«اتهام نامه» نین آدینا «دادنامه» دئییرلر «دادنامه» یعنی «عدالت نامه»!) گتیریب بئله یازمیشدیلار:

«….هابئله بونون[منظورلاری«اکبر آزاد»دیر] گئچمیش سابقه لرینده «ایران سلاحلی قوه لرینین قضایی تشکیلاتی» طرفیندن، استانبول تورکجه سینده اولان کتابلارلا ایلگیلی بیر احضاریه (چاغیریلما) سابقه سینده واردیر! تأسفله بونون[اکبرآزادین] امنیته ضد اولان فعالیتلرینین اؤنونو آلمادا هئچ بیر ائتگیسی(تأثیری) اولمامیشدیر!»

من «ایران سلاحلی قوه لرینین قضایی تشکیلاتی»نین معین ائتدیگی دایره ده، دوز وقتینده حاضر اولدوم! آنجاق منی استنطاق ائدن ایکی کیشی تخمینا ۲۰ دقیقه تأخیر ایله گلدیلر! سلاملاشدیلار! من سؤزه باشلادیم. دانیشیقلار فارسجا ایدی! سوروشدوم:

-منی نه اوچون بورایا چاغیریبسینیز؟

جاواب وئردیلر:

-سیزی بیر مطلع شخص کیمی سنی چاغیرمیشیق! بیر سیرا سورغولار، واردیر اونلاری سوروشماق ایسته ییریک!

من موضوع نون نه اولدوغونو سوروشدوم! دئمه دیلر! سورغولارین داوامیندا بیلدیم کی، احتمالاً «ایران سلاحلی قوه لرینین » بیر دایره سینده ایشجیلری نین بیر گویا تورکجه کتابلار ایله ماراقلانیر! من بونو سئزیب سئچدیکده بئله ایضاح ائتدیم:

-سیز کتابدان قورخمایین! بوگونکو گونده کتابلارین قارشیسینی آلماق اولماز! بوگونکو گونده تئکنولوژی سبب اولوبدور ان یاساق کتابلاری دا، هرکس ایسته سه اله گتیره بیله ر! دئدیم من بیلگی سایاردان و اینتئرنئتدن چوخ باشیم چیخماز! آنجاق اگر ایندی بورادا بیر بیلگی سایار و اینتئرنئت اولسا، ایسته دیگینیز هر هانسی یاساق کتابی اینتئرنئتدن ائندیره بیله رم! بوندان علاوه سیز تهران بیلیم یوردو قارشیسیندا اولان کتابچیلار راستاسیندا و انقلاب میدانی هنده ورینده الده کتاب ساتانلار، بیرچوخو قاچاق کتاب ساتیرلار! سیز هر هانسی یاساق کتابی اورادا الده ائده بیلرسینیز! بعضاًَ حتا نظرده اولان کتابین اصلی نسخه سیندن ده اوجوزراق آلا بیلرسینیز!

کتابی یاساق ائتمک فکرینده اولمایان! کتابا خاطر بیرینی جزالاندیرماق فکرینده اولمایین! اگر بو ایشی گؤرمک ایسته سه نیز، یقین اوتوزاجاقسینیز! نئچه عامل واردیر کی سیزین یاساغینیزا قارشی چیخاجاق:

-بوتون آزادلیق سئوه ر انسانلار سعی ائده جکلر سیزین بو سایاغینیزا قارشی چیخسینلار! و اونو سیندیرسینلار!

-ایش سیز و پولا احتیاج اولانلار دا سعی ائده جکلر بو کتاب یاساغی دوروموندان فایدالانسینلار!

-کتاب بازاریندا چالیشانلار دا سعی ائده جکلر اؤز بازارلارینی باشقالارینا تاپشیرمایالار! و ایسته ر- ایسته مز یاساق کتابلاری گیزلینده چاپ ائدیب یایاجاقلار!

-سیاسی رقیبلر ده بیر-بیری نین علیهینه بیرسیرا یاساق کتابلارین یاییلماسینا یاردیم ائده جکلر!

-یاساق کتابلارین راحت و سهل یاییلماسیندا تئکنولوژینین اساس و مؤثر رولو اولاجاق!

-بیرچوخ فوتوکوپی و ریسوقرافی آدلی آراجلار (اداوات)، فرقلی سلیقه لی آداملارین اختیاریندا دیر! بونلارین بیر سیراسی فرقلی دلیللر اساسیندا، یاساق کتابلاری تکثیر ائدیب یایاجاقلار!

-گئچمیشده یازیلاری چاپ ائتمک اوچون معمول اوزره، الیازمانی قوروشون حرفلرله دوزوب چاپ ائدیردیلر! بو ایش چوخ چتین ایدی! و هر کس اؤز یازیسینی چاپخانلاردا دوزدورمه لی ایدی! آنجاق بو گونلر تئکنولوژینین انکشافی، سبب اولوبدور ایشلر آسانلاشسین! بوگونکو گونده هر جیب تلفونو، لپ تاپ، تبلئت، شخصی ائو بیلگی سایاری و… بؤیوک بیر چاپخانانین ایشینی گؤرور! Word وpdf و… پروقراملار کتاب یازیب کتاب باشی باغلاماق ایشینی، ماراقلانان هر بیر کسه ممکن ائدیبدیر!

-اینتئر نئتده (مجازی فضادا= سانال دنیادا) او جمله دن تئلقرامدا، واتساپدا، فئسبوکده، توییتئرده و… سایر آلانلاردا Word و pdf پروقراملار ایله حاضرلانمیش معمولی کتابلارین و یاساق کتابلارین عرضه سی و الده ائتمه سی بئش – اون دقیقه دن آرتیق وقت آپارمیر!

و من اؤزومدن سوروشورام: بس نه ایچین بئله بیر محدودیتلر، سیخینتیلار، توتمالار و باغلاملاری، کتاب سئوه رلره تحمیل ائدیرسینیز؟

اؤز-ارزومه جواب وئردیم: مقصدلری آرتیق آذربایجان تورکجه سینده ملموس و گؤز اؤنونده اولان مدنی اوجاقلارین سوندورولمه سی دیر! یوخسا یوخاریدا سادالادیغیم دورومو هامیدان یاخشی بیلیرلر! ائله بونا گؤره دیرکی:

-آنا دیلی گونونده ساده بیر مراسیمده اشتراک ائدنلرین اوستونه، دسته ایله هجوم چکیلیر! هرنه یی پوزولور! قادینلاری، اوشاقلاری، گنجلری و یاشلیلاری قورخویا سالیرلار! بو ساده مراسیمه و اونا اشتراک ائدنلره مین بیرقارا یاخیب، اتهام یاغدیریرلار!

-تبریز کتاب سرگیسینده، تورکجه کتاب چاپ ائدن انتشاراتلارین اشتراکینین قارشی سینی آلیرلار! گؤره سن بوندان گولونج ده بیر داورانیش اولا بیله ر؟! تبریزده تورکجه کتابلارین سرگیسینه انگل تؤره دیرلر!!!ویا تورکجه کتاب یایان ناشرلره اشتراک ائتمه یه اجازه وئریلمه یه؟!

– تورکجه کتاب چاپ ائدن و ساتان انتشاراتلارین فعالیتینی دایاندیرالار! باغلایالار! سون نمونه سی ائله «اندیشه نو» و «تک درخت» انتشاراتلاری و….

– مدنی NGO-لارا فعالیت مجوزی وئریلمیر! ساده بهانه لرله ادبی – کولتورل(فرهنگی) مجوزلی درنکلرین فعالیتینی دایاندیریرلار!

– هارادا اوچ-بئش نفر توپلاشیر ایسته ییرلر قانون چرچیوه بیر ایش گؤره لر، قارا یاخیرلار، اوستونه «تشکیل جمعیت» آدینی قویوب، هامینی یاخالاییرلار! ایشدن-گوجدن  ائله ییب؛ حبسه سالیرلار! آغیر هزینه لر تحمیل ائدیرلر! دوروم او قدر سرتلشیبدیر کی، ایندی جاماعت توی–یاس مراسمینی ده  اوشونه–اوشونه توتورلار!  بیر دئییردی ایسته ییردیم اوغلوما «ختنه سورو» توتام؛ قورخدوم انگل تؤره دَه ره لر، واز گئچدیم!(ایکینجی بؤلومون سونو)

(بو یازینین داوامی واردیر!)

___________________________

اندیشۀ نو: یئنی دوشونجه

تک درخت: یالقیز آغاج

بیشتر بخوانید

دیوارگرافیتی ها گسترده در سطح شهر اردبیل همزمان با روز جهانی زبان مادری

اؤیرنجى : فعالین ملی مدنی آزربایجانی امروز ۱ اسفند ۱۳۹۸ همزمان با روز جهانی زبان …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *