خانه / آذربایجان / بوتونلوک ائلچی سی ابولفضل ائلچی بی / اویغونلاشدیران : ا.دیلمانلی

بوتونلوک ائلچی سی ابولفضل ائلچی بی / اویغونلاشدیران : ا.دیلمانلی

«گون او گون اولسون کی، منی تبریز ده محکمه ائتسینلر» سؤزو، بیرله شیک آزربایجان میللتینین باغیمسیزلیق یولونا ایشیق توتان ،وطن و میللت سئودالی سی، رحمتلی اؤندر ابولفضل ائلچی بی ،گونئی آزربایجان میللی حرکتی یولجولاری اوچون، ساده جه بیر تاریخی شخصیت دن عیبارت دئییل دیر.

باغیمسیز آزربایجان جومهوریتینین ان اوست رسمی مقامی اولاراق، باغیمسیزلیق و حورییتی بوتون میللت و تورپاقلاری اوچون بیر «حق» اولاراق گؤروب، بو حق قی ساوونماق دان چکینمه ین ،ساووندوغو حق قین ده یرینی سئوه رک- وئره ن بیر اؤندر دیر.

اونون «حق آنلاییشی» اؤز دئدییی کیمی ،حق قی گؤروب، دئییب و ساوونماق اوزه رینه قورولودور.
او، آزربایجانا دایاتیلان غصب و سؤمورگه چی لرله ایشغالچی لارین گؤرمک ایسته دییی کیمی دئییل ،
آزربایجان میللتینین وارلیق گؤزویله گؤرمک ده دیر ،
اونون اوچون ۴٠ میلیون آزربایجان میللتینین بوتونلویو ایله بیرلیک ده ،تورپاق بوتونلویو واز کئچیلمز بیر ایدئیا و موجادیله سینین باشلانقیج نوقطه سی دیر.
میللت و تورپاق بوتونلویونو، آزربایجان میللتینین گوجلو گله جه یه صاحیب اولماسی اوچون وازکئچیلمز اولدوغونا اینانماقدادیر.

موجادیله باشلانغیجینی بوجور جیزدیغی و بو یولو ساووندوغو اوچون ،گونئی آزربایجان میللی حرکتینه یئنی بیر روح آشیلایاراق، اسیر بیر میللتین گؤزونده ،آزاد و آیدین بیر گله جه یه آینا توتماقدادیر.

هئچ شوبهه سیز کی ،رحمتلیک ائلچی بی یین باغیمسیز آزربایجان جومهوریتینین ان اوست رسمی مقامی اولاراق «بوتؤو آزربایجان» سؤیله مینی گوندم ده توتماسی ایرانلا ،گونئی آزربایجانین وارلیغینی گؤرمزدن گلمه بهاسینا کئچینن لرجه ،اونون ایتتیهام ائدیلمه سینه نه دن اولموشدور؛
آما، او بو حق قی ساوونماق اوچون کیمسه دن ایزین گؤزله مه یه جک دیر.

اونون ،باغیمسیز آزربایجان دا جومهورباشقانی اولاراق سئچیلمه سی و بو مقام دا ساووندوغو بوتؤولوک ایدئیاسی، گونئی آزربایجان حرکتی اوچون بیر دؤنوم نوقطه سی اولموشدور.

اؤزو آیدینلاتدیغی کیمی ،آچیق و دئموکراتیک آزربایجان ایدئیاسی ایسه ،میللتینه بسله دییی درین سایغی و سئوگی سینین ان آچیق گؤسترگه سی دیر.
اؤزللیکله بیر گونئی آزربایجان میللی حرکتی منسوبو اولاراق – بونو بلیرتمک، میللی وفا و شرف بورجومدور.

او، بیزی قوزئی آزربایجانا باغلایان ان گوجلو باغلاردان بیری دیر. اونون آدینین گونئی آزربایجان میللی حرکتی ایله بوتونلشمه سی و ایرانین هله ده آدیندان قورخدوغونون بوگون «قاراباغ بیزیمدیر» سس لرینین گونئی آزربایجان دان اوجالماسیندا چوخ بؤیوک پایی واردیر.

اصلینده اؤز دئدییی کیمی ،تبریز ده یارغی لانماق (محکمه ائدیلمک) ایسته ین ابولفضل ائلچی بی یین،بوگون ان بؤیوک ساوونوجوسو گونئی دیر ،تبریز دیر ،اورمودور ،اردبیل دیر، زنجان دیر.

او، هم بینیمیزین، هم قلبیمیزین، هم ده یولوموزون ایشیغی دیر و بلیرتدییی گله جه یه دوغرو گئتمک ده ایلهام قایناغیمیزدیر .
تک جمله ایله ابولفضل ائلچی بی یی آنلات دئیه سوروشسالار ،هئچ شوبهه سیز “یولوموزدور ” دئیه رم.

اوردا بیر یول وار اوزاقدا /
او یول بیزیم یولوموزدور.
دؤنمه سک ده ،وارماساق دا /
او یول، بیزیم یولوموزدور.

ائلچی بی یین گونئی آزربایجانا ائتکی سینین نه اولدوغونو، بوتون آزربایجان بیرلییی اویه سی جاواد ایسماییل لی بوجور آچیقلاییر :
بیر گونئی آزربایجان تورکو اولاراق صمیمیت له دئیه بیلرم کی، وطن و میللت سئورلییی، کیملییمی، عینی زاماندا دئموکراسی آنلاییشینی جومهورباشقانی ائلچی بی دن و اونون یاراتدیغی تورکچولوک اوخولوندان اؤیرندیم.

جسارت له دئمک ایسته ییرم کی، سووئت لر داغیلدیقدان سونرا ،قوزئی آزربایجان دا ایش باشینا گلن خالق جبهه سی حرکتی و اونا لیدئرلیک ائدن ائلچی بی یین اونو ،گونئی آزربایجان دا یاییلمایا باشلادی.

اونون لا گؤروشمک اوچون، گونئی آزربایجان و دونیانین بیر چوخ یئریندن باکی یا آخین باشلادی. ائلچی بی، هم جومهورباشقانی اولدوغو دؤنم ده ،هم ده دئوریلدیک دن سونرا ،گونئی آزربایجانی هئچ اونوتمادی. دانیشیقلارینین هامیسیندا ،گونئی آزربایجان تورک لرینین حق لرینی دیله گتیردی.

١٩٩٧ ده «بوتون آزربایجان بیرلییی»آدلی سازمانی قوردوقدان سونرا، گونئی آزربایجان دا میللی اویانیش حرکاتی گوجلنمه یه باشلادی. بو دالغا ،قیسا سوره ده ایرانین هر طرفینه یاییلدی.

تملی ،دوکتور زهتابی دؤنه مینده باشلایان «بابک قالاسینی» زیارته گلن لرین ساییسیندا مؤحتشم بیر آرتیش اولدو و سایی لاری میلیونو کئچدی.

مسجد لرده قاراباغ شهیدلری آنیلمایا باشلاندی. ائلچی بی یین گونئی آزربایجان لا ایلگیلی دانیشیق لاری، ایران سیاسی لری طرفیندن راضی سیزلیق لا قارشیلاندیغی حال دا، تورک لر آراسیندا بؤیوک هیجان یارادیردی.
اون ایللر بویو کیملییی الیندن آلینمیش بیر میللت ،آرتیق صاباحا اومیدله باخمایا با‌شلامیشدی.
ائلچی بی یین فیکیرلری ،قیسا سوره سونرا، تبریزین سهند ایستادیوموندا «ایران فارس دئییل» شعارینین سسلنمه سینه گتیردی.

ائلچی بی ده ،میللتینه اولان سونسوز سئوگی ،صمیمییت و صداقت، میللی عقیده، سیاسی دوشونجه، ایجتیماعی و ایقتیصادی اخلاق، تورک میللیتچیلییی، یولسوزلوغا قارشی یوروتدویو موجادیله ،دئموکراسیه اولان اینانجی و ان اؤنملی سی گونئی آزربایجانا اولان بیتمز ،توکنمک بیلمه ین سئوگی سی ،اونو گونئی آزربایجان تورکلرینین سئوگیلی سینه چئویردی.

ائلچی بی یین فیکیرلری بوگون گونئی آزربایجان تورکلرینین یولونو آیدینلاتماقدا و گنج لیک اونون آرزولادیغی بیرله شیک آزربایجانی قورماق دا قرارلی دیر. من ده ائلچی بی یولونون میلیون لارجا یولجوسوندان بیری یم.

(باب (بوتؤو آزربایجان بیرلییی) ایداره هیئتی اویه سی، گوناز تی وی پروگرام یاپیم جی سی و سونوجوسو، جاواد ایسماییل لی)

 

دیره نیشدن باغیمسیزلیغا، ائلچی بی» کیتابیندان ؛ یازار: عاقیل صمد بیلی

بیشتر بخوانید

عیادت اکبر آزاد و حسن راشدی از استاد حسین محمدزاده صدیق

اؤیرنجى: اکبر آزاد و حسن راشدی نویسنده و فعالین سرشناس آذربایجانی دیروز ۲ تیرماه ۱۴۰۱ با …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *