پنج شنبه - ۲۸ تیر ۱۳۹۷
خانه / آذربایجان / بو منم،قورخمایین! / هاجر دهقان

بو منم،قورخمایین! / هاجر دهقان

بو یازی آزربایجان قیزی ،معصومه نین اسید سپیلمه جنایتینه معروض قالدیغی اوچون یازیلمیشدیر.

سحر بوتون او چکیلمزآغریلاریملا آییلیرام یورقانی اوستومدن آتیب گرنه شدییمده گؤزوم ال لریمین بوزوشموش دریسینه تاخیلیب قالیر. بیر آن اوزولوب یورقانی بیر داها باشیما دوغرو چکیب یئنی دن یاتیب اویوماق ایسته ییرم، آنجاق اؤز-اؤزومه بوش وئر اولان اولوب، داها اوگونلری او گؤزللییی قایتارماق اولماز ،ذاتن آیلاردیر بو یورقانا قیسیلیب ساخلانمیشام.

آرتیق سیل باشدان باشلامانین واختی گلیب چاتیب دئییرم ،بونلاری دوشوندویومده آینایا ساری اوزانیر آیاقلاریم .
آیلاردیر اوزونه باخمادیغیم آینانین قارشیسیندا دایاندیغیم آن اوزومو تانیماییب دیسگینیرم سونرا یئنه اؤز – اؤزومه بوش وئر دئییب، ماسانین اوزریندن گؤز قلمینی گؤتوروب وار اولان تک گؤزومون اوزرینه قارا بیر چیزگی چکیرم و آغاردیجی کئرئمیمی آلیب اوزومون او چیرکین و درین چالا چوخورونو دولدورمایا چالیشیرام .
سونرا او چوخ سئودییم اونجه لر هر زامان سوردویوم پنبه روژو گؤتوروب اوزومده محو اولموش دریمله بیر رنگ ده اولموش هچ گؤرونمه ین دوداقلاریما سورتورم و دالی چکیلیب اوزومو آینادا سوزه رک بوگون یئنی دن باشلاماق اوچون گؤزل بیر گون دور دئیه میزیلدانیب مانتو و شالواریما ساری قاچیب ، تله سه رک گئیینیرم .
آنام منی گؤرجه ک تعججوب لنیر و نئچه آیدان سونرا نولدو بیرن بیره ائشیه چیخماق ایسته ییرسن؟ دئیه سوروشور.
آنامین اوزونه اوپوجوک قوندوروب بیر سؤز دئمه دن یئهین کوچه قاپیسینا طرف قاچیرام. قاپینین دالیندا دایانیب بیرآن گئتمه ک دن واز کئچیرم.
ال لریم بوز کسیر آیاقلاریم تیتره ییر، قورخاراق دال دالی گئدیرم آنجاق آنامین ایسته سن منده یانینجا گلیم دئیه ن سسی منی اؤزومه گتیریر.
بوتون جسارتیمی توپلاییب قاپینین ایشگیلین چکیب اؤزومو کوچه یه بوراخیرام.
کوچه ده سس – کوى سالیب، توپ اوینایان اوشاقلارا گولوجوک آتیرام آنجاق ندن سه اونلار سس لرینی کسیب پیشیک گؤرموش جوجه لر کیمی چیغیرا – چیغیرا هره سی بیر یؤنه قاچمایا چالیشیرلار .
اونلاری آلدیرمادان آنلیما بوراخدیغیم ساچلاریمی یغیب شالیمین قیراقلاریندان ایچه ریه بوراخیرام و دیلیمین آلتیندا بو گون گؤزل گون اولاجاق دئیه میزیلدانیب امین آددیم لارلا ایره لی له ییرم .
بیراز ایره لی ده بیرآرایا توپلانیب هیجانلا منی بیر بیرینه گؤرسدیب (واه واه )(یازیق قیز )(بئله اولدو ائله اولدو )(گرک چیخمایا ائشیه)(اوشاقلار قورخدولار)دئیه ن قادینلاری گؤرورم.
اونلارا ساری یئرییب نه وار کی؟نولوب کی؟نه پیچیلداشیرسیز؟دئیه حیرصیمی بوشالتماق ایسته ییرم آنجاق الیمی یومروقلاییب گولومسه یه رک یانلاریندان کئچیرم و هچ نه بوگون کئفیمی پوزا بیلمز سؤزونو دیلیمین آلتیندا تکرارلاییرام .
سوآلماق اوچون سوپرمارکته ساری یئریدییمده سوپرمارکتین اؤنونده دوران بالاجا اوغلان اوشاغینا اؤپوجوک توولاییرام آنجاق او اوپوجویومو گؤرمویه ن کیمی قورخاراق آغلامایا باشلاییر ، من اونا یاخینلاشیب اوودماق ایسته دیکجه اوداها آرتیق قورخور ،چیغیریرو قاچمایا باشلاییر.
تله سه رک شالیمی آرتیق اولمایان ،یانیب قاورولموش قاشلاریمین اوزرینه چکیب اوردان اوزاقلاشیرام و اؤز – اؤزومه باخ آرتیق چیرکین اولان هچ نه اولمایاجاق هرشئی یئنی دن باشلامالیسان بوگونون گؤزلیینی هچ نه پوزمایاجاق دئیه دئییب یولومو توتوب گئدیرم . قارشیدان اوجا بویلو بیر کیشی بالاجا بیر قیزین الیندن توتوب دولانا دولانا گلیرلر آنجاق کیشی منی گورر گورمز قورخوب تدیرگین بیر وضعیت ده ایلیب ال لرینی قیزینین گوزلرینه توتور و اونو اوردان اوزاخلاشدیریر…
بو سون اولای اوریمین صبیر بارداغینی داشیردان سون دامجی اولور ائله کی بوتون بونلارا دایانماییب یئته ر آرتیق باشیما بونلاری گتیرن می قورخونجدور یوخساحیاتیندان گوزلییندن گنجلییندن اولموش من می ؟
اینسان ایچینه چیخا بیلمه یه ن او مو اولمالیدیر یوخسا من می؟
او مو اینسانلاردان چکیلیب اوزونو توتمالی یوخسا من می؟
دیه چیغیریرام
و شالیملا باشیما تاخدیغیم پئروغو گؤتوروب گؤزومده و دوداقلاریمدا کی سؤزده بزه یی سیلیب بومنم آیلار اونجه گنجلیی گوزلیی قورخونج بیر وضعیتده ایرنج بیر کیشی طرفیندن یوخ ائدیلن من دئیه دیله نیرم…
و اوزومده ساغ قورتولوب قالان بیر گؤزومله ائویمین یولونو توتوب قاچاراق گلدییم یولو گئری قایدیرام.

بیشتر بخوانید

قوتادغو بیلیگده دؤولت فیکری

اؤزت        بالاساغونلو یوسوف طرفیندن ۱۰۶۹/۱۰۷۰ ایللرینده قلمه آلینمیش اولان قوتادغو بیلیگ، تورک دؤولتی’ نین …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *