خبر فوری
خانه / مقاله / بیر صیرب ایستیـقلال چیـنین اؤز اوشاغـینا اولان گؤزه ل وصییـتى ؛ دیل امانتى

بیر صیرب ایستیـقلال چیـنین اؤز اوشاغـینا اولان گؤزه ل وصییـتى ؛ دیل امانتى

 

ایستیفان نمانییا(اؤلوم۱۲۰۰ میلادى)نمانیـچ شاهـلیغـینین و صیرب اورتودوکس کیلیساسیـنین قوروجولاریندان دیر.نمانیـچ خانیدانى صیرب میللیتیـنین یارادیلیـشیندا چوخلو
چالیشمـیشدیلار و سونوندا ۱۲-جى یوزایـللیک ده صیرب اورتودوکس کیلیساسیـنین باغـیمسیزلیق اوتورومون قـویا بیلمـیشدیلر.

ایستیفان نمانیانین(دیل امانتى)آدیندا آدلیم وصییت نامه سى،صیرب لى لرین میللى بیلدیریش حؤکمونده دیر.دیل امانتـینی صیربیستانین بوتون کولتوره ل و اؤرگتمه قوروملاریـنین دووارلاریندا گؤرمک اولور و گاهـدان بیر قزئت لر و درگى لرده یاییم لانیر.نمانیا بو مکتوبدا،”دیلى میللییـتینین جؤوهره سى بیلیب” .

” ایستیفان نمانیانین وصییت نامه سینده ن بیر پارچا ”

عــزیز بالام:

اؤز دیلین قورو،آنجاق اؤز وطنین قورودوغون کیمی.

تورپاقلارین،شهرلرین،جانلارین الده ن وئره بیله جه ین کیمی،سؤزجوک لرى ده الدن وئره بیلرسن. دیلینی،تورپاقلارینی،جانلارینى الدن وئرن بیر میللت دن نه قالاجاق؟
” او داها میللت دئییل”

اوغــلوم:

بیرداها یابانجى سؤزجوک دیلن گتیرمه،یابانجى سؤزجوکو دیلن گتیردییـن زامان، سن اونا اوستون گلمه ییرسن،بلکه ایچریـدن اؤزون ایله اؤزگه لشیرسن . اؤلکه نین ان بؤیوک و ییخیلماز شهرلرینـین الـدن وئرمه سى، دیلینده اولان ان کیچـیک سؤزجویون الدن گـئتمه سیندن داها یاخشى دیر.اؤلکه لرى قیلـینج دان باشـقا دیل ایله ده اله کئچیرمک اولار.

آییـق اول سؤزجوکـلرین بنده چکیلیب و آرادان گئتمه سى، یابانجى لارین اوستون گـلمه سى دیر.
سؤزجوک لرینى اؤزگه لره اودوزان میللت لرین یاشامى سونا اره جک.

سـئوگـیلى اوغـلوم :

بدنین خسته لییـى کیمى،دیلى دارغـین ائدن ده وار.منیم بئله جه عـفونت لى و سیرایت ائدیجى خسته لیک لر یادیمدا دیر.

میللت لرین قونشو اولدوغـو یئرده و دیل لرین سورتوشدویونده،بو سیرایت ائدیجى لر،چوخراق بیر میللتین چئوره سین ائـتگى لندیریرلر.

من ساواشلاریمدا،دیلدن قورخودوجو بیر سیلاح کیمى فایدالاندیم. من ده بو سیرایت ائدیجى و اؤلدورن خسته لیـیی،دوشمنیمین دیلینده یایـیب و اؤز قوشـونومون سیـپرى ائدیرم.

قوشونلاریمى و دؤیوشچولریمى،یارى اله کئچیردییـیم اؤلکه لره گؤندریب و چوخراق شهرلرى قیلـینج لا یوخ،دیل ایله اله کئچیرمیشم.

سئـویم لیم:

اولا بیلیر ایکی میللت بیر بیری ایله ساواشـیب یا باریش دا یاشاسین،اما ایکی دیل هـئچ زامان باریش دا اولا بیلمز.

ایکی میللت آنلاشمادا و بیرلیکـده یاشایا بیلرلر،اما دیل لرى بیر بیرى ایله تکجه ساواشـدا اولاجاق.

ایکی دیلین ایلگی ده اولدوغـو و قاریشدیغی،ایکی قوشونون بیر بیری ایله اؤلوم دیریم ساواشـینا بنزه ییر.

ایکی دیلی قولاق ائشیددییى بیر زامان،هـئچ بیریسی ساواشدا غالیب گلمه ییب.

بیر دیلین او بیریسیندن چوخ قولاق ائشیددییى زامان،ساواش سونا اریر،و بیر دیل آرادان گئدیر.
بیر دیلین اؤلمه سیندن سونرا،بیر میللت ده آرادان گئدیر.

ائـولادیم:

بیلمه لى سن: دیل ساواشلارى،ایکی قوشونون بیر ایکی گونلوک،و میللت لرین بیر ایکی ایل لیک ساواشی کیمی یوخ،اولا بیلیر یوز ایل لرله اوزون سورسون.

اینسانین عـؤمروندن کئچن بیر ایکی دقـیقه لیک زامان کیمی،بو سوره ده دیل اوچون چوخ قیسا دیر.

اوغـلوم:

دیلین اؤلومو و سیرایت ائدیجى خسته لیـیی بو دئمه کدیر:
اولوسون تک تکی اؤز دیلینه دال دؤنده ریر،او زامان ایستر ایسته مز یابانجـینین دیلین منیم سه ییر.

بوتون ساواشلاردا یئنـیلمک،دیلین الدن وئرمه سیندن یاخجى دیر.هـر میللـتین دیلى اؤلدوکـدن سونرا،اؤزوده اؤلور.بیر میللتین دیلى وار کن دیری ساییلیر.

اینسان آنا دیلینی بیر ایلده اؤرگه نیر و عـؤمور بویـو یاددان چـیخارمیر،یابانجى دیلى بیر ایلده اؤرگه ندییـیندن،آنا دیلینی بیر ایلـده یاددان چیخاریب اؤزگه دیلینی اونون یئرینه یئرلشدیره بیلمیر.

گـؤزه لـیم:

اؤزگه دیللى لردن گؤزله یین،اونلارین نئجه گیزلین گـلدیک لرى بیـلینمز،هر آددیمدا سیزه باش اییب یول آچارلار.

ایلکـین ده، دیلینیزى بیلمزلیکـدن،کؤپک لر کیمی سیزه یالتاقـلانیب،اؤزلرین شیرین سالارلار.

اونلارین سـس سیز اولدوغـوندان،نه دوشـوندوکلرینی و نه ائده بیله جکلرینی باشا دوشموروک. ایلک گلنلر، بلدله مک اوچون گلیرلر،باشقا لارینا خبر ائتدیکدن سونرا هامیسی گلیرلر.

قـنده ال تاپمیـش قاریشـقالار کیمی،گئجه واختی ساییسـیز سورولرده یاواشجاسـینا سورونورلر.

بیر گون یوخودان اویاندیقـدا،اؤزگه دیللی لر سیزین آلانیزی (دؤورونوزو) آلیب،اؤزوزو اونلارین اسارتینده گؤروب و گئج اولدوغـونو آنلارسیز.

اونلارین دیلی،ماهـنیسی،دب لرى،عـنعنه لرى و اویون هاوالارى واردیر،قـووغاچى لارى هاى کوی سالیب قولاغـى کار ائده جک لر،اوندا دیلسیز و کار(سس سیز) اولمادیقـلارینی بیله جکسـیز.

ایندی اونلار یالواریب یالتاقلانیب و دیلـنچى لیک ائتمه یه جکـلر.سن اؤز ائوینده اؤزگه اولدوقـدان سونرا، بوندان باشـقا ال اوزالدیب و هـر نه وارین سا زورلا آلاجاقلار.

ائوین و یوردوندان سورگون دوشمک اوچـون،اونلارلا ساواشیـب زورلا ائشیـیه اؤتورمکـدن باشـقا یولون یوخدور.

اؤزگه دیللـى لرین الینه کئچـن یوردلارا قوشون گؤندرمه یین، اونلارین قوشونلارى گلجک لر تا دیل ایله آلدیـقلارینی ییـیه لنسین لر.

منـیم بــالام :

دیل هـر قالادان یئنـیلمز دیر.

قالا و حاصارلارین دوشمن الى ایله داغـیلدیغـیندا،اومودسـوز اولما،دیلین باشـینا گلنلره یاخشى باخ و سورکـلى زیانسـیز قالدیغـیندا،قورخویا قاپـیلما.

خبرچی لرین له تاجیرلرین،الدن گئدن تورپاقلارینین درین لییـینه گؤندر تا اینجه لیک له قولاق آسـسین لار.

سؤزجوکلرین کوشولده ین و قیزیل یئرینه خرج له نن یئرلرده ،بول او یوردلار باشـقاسیـنین حؤکومدارلیـغى آلتـیندا اولسادا،هله او یئرلر بیزیـم دیر.

اؤلکه لر و دؤولت لر پارچالانیر،شاهـلیق لار گـلیب گئدیر،اما داواملى قالان دیل ایله میللت دیر.
اؤلکه نین آیریلـمیش تورپاقـلاری و ایستعـمار اولونان میللت،بیر گون اؤز آنا دیلینین قوجاغـینا و کؤکونه قاییداجاق.

نــازلیـم :

بیل گینن اؤلکه نین آیریلـیغى، بیر نسیلـدن چوخـونون، میللى کـیملییـینه قـورخونج اولا بیلمز.
کیملیک،نسیل لردن،شهرلردن، اؤلکه لردن قالارلی و دایانیـقلی دیر.اؤزگه اسارتیـنده اولان مـیللت،سـددلر دالینداکی سویا بنزه ییر،بیر گون سـددلر داغـیلیب بالاجا چای لار بیر بیرینه قـوووشاجاق.دیل همین سودور. سددلرین دال قاباغـیندا اولان سو .

دیـل او گوجلو و زورلو سو کـیمی یاواش یاواش قایالاری چاتلادیـب و داغـیلمیش میللتی قایالارین،سـددلرین و سیـنیرلارین دالیندان بیر بیره قوووشـدوراجاق .

چئویره ن : ا.دیلمانلی

بیشتر بخوانید

خورداد اولای‌لاری، تورک اویانیش سوره‌جی باخیمیندان / محمد رحمانی فر

  ۱۳ ایل بوندان قاباق، ایران قزئته‌سینده یاییملانمیش بیر کاریکاتور بو اؤلکه‌ده یاشایان تورک‌لری خیاوان‌لارا …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *