خانه / آذربایجان / تورک دیلیمیز، میللی وارلیغیمیزدیر / بورلا توران

تورک دیلیمیز، میللی وارلیغیمیزدیر / بورلا توران

 

 

“دیل وارلیغین ائویدیر ” هایدگر

هر میللتین اؤزونه آیید یوردو و آنا دیلی واردیر، بو وارلیقلار ایسه او میللتی یاشاداندیر.
دیل میللی کیملیین ایلکین تملی ،اینسانلیغین کئچمیشدن قالیب و گلیشه ن ایزی،
هر میللتین کولتورونون و کیملیینین باشقا میللتلر آراسیندا اولان تمثیلچیسیدیر.

دیل اینسانلارین ایلگیلنمک گره یی دیر.

تورک لر تاریخ بویو ۱۶ دؤولت قوردوقلاریندا، تکجه اونلاردان اوچو ایسلام اینانجینی داشییب چوخلاری ایسه شامانیست اولموشلار، آنجاق هر زامان دیللری تورکجه اولموشدور و ایندی ایسه ده بوتون تورک ائللرینین دیلی تورکودور.

تورک دیلیینین چوخ زامانلار دؤولت دیلی ،یازی و اوخول دیلی و تاریخ بویو عؤمورلوک دانیشیق دیلیمیز اولدوغوندا،ائله جه تورک میللتینین دین و اینانجی ده ییشه بیلمیشدیر آنجاق تورک میللتی و دیلیمیز هر زامان یاشاییب و وارلیغینا دوام ائتمیشدیر.

دئمه ک بیر میللت حؤکومت شکیلینی، اینانج و دینینی ده ییشیرسه ده، دیلینین یاشاماسیلا او میللت تاریخ صحیفه سینده ابدیلیک جانلی دیر. آنجاق یوز ایللیک چاغیمیزدا بئله دیلیمیز یوخ ائدیلسه یدیر، بوگون دونیادا تورک میللتی دئیه بیر ایز قالمازدیر.

دیلی یوخ ائدیلن بیر میللتین آدی، تاریخین یاشلاندیغی ایله بیرگه اونون صحیفه لریندن سیلینر.

اؤرنه ک اولاراق تاریخ ده یازیسی و مکتبی اولان سومرلر کیمی بیر چوخ میللت لر، دیلی یوخ اولونجا تاریخ صحیفه لریندن سیلینیب ، یالنیز تاریخین اؤزو و صحیفه لرینده ایزلری قالدی، ایندی ایسه سومر آدیندا بیر میللت یوخوموزدور.

دئمه ک روس ،آلمان و فرانسه دیلی یوخ ائدیلسه یدی او اولوسلارین ادبیاتی ، شئعری، ناغیل لاری، آتا سؤزلری،اینجه صنعتی، تئاتری و … هامیسی یوخ اولوب، یالنیز تاریخ ده بیر آنی کیمی یاد اولاجایدی.

دیلچی لرین آراشدیرمالارینا گؤره ،چاغیمیزدا بیر میللتی یوخ ائتمک ایسته سه ز اونو فیزیکی اولاراق یوخ ائتمه یه گره کمیر.
بیر اولوسون دیلینی یوخ ائتدیینده او میللت بیر ایکی نسیل سونرا بوتؤولوکله یوخ اولاجاقدیر.
دیلی یوخ ائدیله ن بیر میللت دن ایه ر وارسا یالنیز کیتابلاری و یازیلاری تاریخده بیر آنی اولاراق آنیلاجاقدیر.

دیل عالیملرینین دئدیک لرینه گؤره ، مکتب و یازی دیلی اولمایان دیل یوخ اولماغا دوغرو یورودولمه کده دیر.
او دیل کوچه بازاردا دانیشیلمیرسا یوخ اولماق تهلوکه سی داهادا آرتیر و او دیلی بیلن اینسانلار آرتیق ائولرینده بیله او دیلی قولانمیرلارسا او دیل آرتیق یوخ اولما تهلوکه سینین سونلاریندادیر.

بوگون گونئی آزربایجان تورک میللتینین تورک دیلی مکتب دیلی دئییل و آزربایجان شهرلرینین بیر چوخوندا بو دیل آرتیق کوچه بازاردا و ائولرده بیله دانیشیلمیر.

بو تهلوکه گئتدیکجه آرتیر …
بئله گئدیرسه دیل اوزمانلارینین دئدیینه گؤره دیلیمیز یوخ اولمایا دوغرو گئدیر.

فارس شوونیزمی ایللر بویودور دیلیمیزین محو ائدیلمه سی ایله میللتیمیزی ائلینه ائدیب یوخ ائتمه سینه چالیشماقدادیر، بیز آزربایجان میللتی تورک دیلیمیزین ان ده یرلی میللی وارلیغیمیز اولدوغونو باشا دوشوب جانیمیزلا و مالیمیزلا اونا دستک اولوب قورونماسینا چالیشمالییق.

فارس شوونیزمی ائله یاخشی بیلیر، آزربایجان میللتینین تورک دیلینین اؤزگورلویو و مکتب لرده اوخونوب یازی دیلینه چئوریلمه سی ایله بیرگه اونون سؤمورگه چی سیستئمی نین عؤمروده سونا اره جکدیر.

میللتیمیزین اؤز دوغما یوردوموز آزربایجاندا ایستیقلالینی ال ده ائدیب اؤز میللی دؤولتیمیزی قوران گونه دک هر بیر آزربایجانلینین میللی گؤره ولریندن بیری ده دیلیمیزین قورونماسینا ده ستک اولماسیدیر.

بو یازی ۲۱ فئورال- دونیا آنادیلی گونو موناسیبتینه گؤره یازیلمیشدیر.

بیشتر بخوانید

۲۱ مارس ،روز جهانی مبارزه با تبعیض نژادی ؛ سکوت غم انگیز روشنفکران ایرانی!

اؤیرنجى : امروز ۲۱ مارس مصادف با روز جهانی مبارزه با تبعیض نژادی است لاکن …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *