چهارشنبه - ۳۰ آبان ۱۳۹۷
خانه / آذربایجان / تیراختورچو قیزلار / محمد رحمانی فر

تیراختورچو قیزلار / محمد رحمانی فر

بیر چوخ آذربایجان قیزلارینا تای، منیم ده قیزیم اوشاقلیقدان تیراختور سئوگیسی ایله بؤیوموش اولدوغونا گؤره سهند استادیومونا گئدیب یاخیندان بو تاخیمی آلقیشلاماغا چوخ ماراقلی ایدی. بو آرزی‌نین اولاناقسیز گؤروندویونه باخمایاراق، بیر گون قیزیمین الیندن یاپیشیب اونو اؤز ایسته‌یینه چاتدیرماق ایسته‌دیم. او زامان قیزیمین ۸ یاشی وار ایدی. گؤزله‌نیلدییی کیمی قاپیدا قاباغیمیزی کسدیلر…

آنجاق، ائله‌بیل، او گون شانس بیزه اوز گتیرمیشدی: بیردن بیره مأمورلارین بیری منی تانیدی. قیزیمی استادیوما آپاردیغیما گؤره منی قینادیغینا باخمایاراق، بیزیم استادیوما گیرمه‌یییمیزه امکان یاراتدی. بئله‌لیک‌له، قیزیم ایلک هابئله بوگونه‌ دک سون دؤنه اولاراق، اؤز ایسته‌ییینه چاتیب، سئودییی تیراختور تاخیمینین اویونونو یاخیندان ایزله‌دی…

دونن تبریزین کسایی اوتوبانیندا قیرمیزی بایراقلی تیراختور سئودالی‌لاری آذربایجانیمیزین بوتون شهرلریندن سئل کیمی قوردلار دره‌سینه آخماقدایدیلار. قیزیم بو ماراق دوغوران صحنه‌لری گؤردوکده یئنه ده استادیوما گئتمک ماراغینی دیله گتیردی: “آتاجان من ده استادیوما گئتمک ایستیرم؛ من ده یاخیندان تیراختورو آلقیشلاماق ایستیرم…”

قیزیمین سؤزلرینین سوموک کیمی بوغازیما ایلیشدییینه باخمایاراق، او آن اونا توختاقلیق وئرمه‌لی ایدیم. “اولار قیزیم، قیسمت اولار بیر گون بیرلیکده گئدریک استادیوما” سؤزونو دیله گتیردیییمده، بو قیسمتی اؤز ال‌لریمیزله یاراتمالی اولدوغوموزو یاخشی بیلیردیم…

 

بیشتر بخوانید

‍ بابک قالاسی / حاضیرلایان:حامد آقائی

در جنوب رود آراز ، کوه های بسیار صعب العبوری قرار دارند که به نام …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *