چهارشنبه - ۲۸ آذر ۱۳۹۷
خانه / آذربایجان / جیسمین یانیمیزدا اولماسادا اوجا روحون یانیمیزدادیر ، ای حسن آزربایجان / جواد رنجبر

جیسمین یانیمیزدا اولماسادا اوجا روحون یانیمیزدادیر ، ای حسن آزربایجان / جواد رنجبر

 

باشین ساغولسون آزربایجان.

کئشکه یوخودان اویانیب بو خبر یالاندی گؤرسه یدیم، آخی بئله بیر آجینی نئجه یاشاماق اولار کی؟

آجینین، آجیلیغینا دؤزه بیلسه ک ده ، آتاسیز آزربایجانین طالعی نئجه اولاجاقدیر کی؟

هله میللی بایراغین بیرلیک یاراتما ذؤوقونو یاشادیقدا ،حسن آزربایجانین او یاتاقدان دوروب دیم_دیک هر زامانکی کیمین یانیمیزدا اولماسی گؤزله نیلیردی.

حسن بی ،منی اؤیرنجیلیک اوچون باغرینا باسیب یوللاندیردیغیندا ؛ ائله دؤنوشومده ده گؤروشوب باغرینا باساجاغدین دئمیشدین، ایندی وطنه گئری دؤندویومده سنسیزلیه نئجه دؤزه بیله رم کی؟!

سن بو میللی حرکت ده اولان ،هر بیر گنج اوچون اومود اولدون، دیم _دیره ک دایاق اولدون، هر زامان یئندییمزده گوجوموزه گوج قاتدین ،تویوموزدا واردین ،آجیمیزدا، شنیمیزده…

هر گؤزوموزو یوموب، آچیب یئنی گون بیر میللی ایشه باشلادیغیمیزدا باشیمیز اوستونده سن واردین، نه اولور بیرده گؤزوموزو آچیب یومدوغوموزدا یالاندیر بو خبر ده!

اما بیلیرم کی بو گرچه یه اینانمالیام.

بو بیزیم و سنین آرامیزدا اولان آجی طالعیمیزدیر بی ،ایسته ر _ایسته مز بوگونوموز آیریلیقلا باشلادی، اما فیزیکی آیریلیق بیزلری روح سل اولاراق آیری سالا بیلمه ز و اوجا روحونو ائله بو گونوموزده ده بیزیمله گؤروره م.

بی سنه وئردییم سؤز هر زامان یئرینده دیر، هر زامانیم و هر آنیم آزربایجانلا و وطن _میللت اوغروندا چالیشماق اولاجاقدیر.

بوگون هامیمیز سنینله یدیک بی ییم ،و اینانیرام کی سنده بوگون هامینی بیر آرادا گؤردون ،بوتون ائولادلارین، فیکیرداشلارین و یول یولداشلارین ، آزربایجانین بوتون شهرلریندن سنله وداعلاشماق اوچون گلمیشلر.

آنجاق بوگون اون مین لر اینسان جیسمینله یاخیندان وداعلاشسادا ، چوخلولاریمیز اوزاقدان گؤز یاشی تؤکوب سنله چوخ اوزاقلاردان وداعلاشدیق. 

آزربایجان میللتی ائله گرچک دن ده، سون گؤروش اولاراق حسن بی آزربایجانا یاراشدیغی کیمی باشینا توپلانمیشلار.

بوگون، نه قده ر میللت ایچینده بیر ائل  بی یی اولدوغونو ایچیمده ن حیس ائتدیم بی.

هر زامان اوره یین آزربایجان اوچون چیرپینمیشدیر، اوره یین دوردوغوندادا؛ یئنه آزربایجانا باشقا بیر خیدمت ده بولوندون !

دوغرودور ،ایللر سونرا مزارین اوستونده مینلر میللیتچی توپلانمیشدیر.

ایل لر سونرا فیزیکی اولاراق دا اولسا وطن دوشونورلری و قایغیسین چکنلر بیر آرادا گؤروندولر. 

آخی سن هر زامان بو گونلری گؤرمه ک اوچون و بو بیرلیک اوچون چالیشدین ، یانیمیزدا اولماساندا آنجاق سونوندا بو بیرلیی ایللر سونرا سن یارادا بیلدین. 

داریخما بی ییم ، وداعلاشما نامازینی دا اؤز فیکیرداشلارین و میللتچیلر باشدا اولاراق قیلدیلار، بوگون نامازینی عظیمی بی قیلدی ،بوگون هر نه اؤز ده ن اؤزه یدیر. 

نه قده ر ده نیاران اولسایدیم یوخلدغوندان، آنجاق عباس بی یین مزارین اوستونده دانیشیق فایلینی ،اوزاقلاردان باخیب دینله دییم ده اوره ییم یئرینه گلدی بی !

هئچ نیاران قالما قوجامان ایگید ،وطن قهرمانلاری و عباس بی لیسانی کیمی کورشادلاری سنین سسلندیردیین حاق سسی،دالغالاندیردیغین بایراغی یئرده قویمازلار. 

سون آیریلیغیمیز، هر زامان سن بیزلره سسلندیردیین میللى مارش (گنجلیک مارشی) اولدو بی ؛

آزربایجان سن سن منیم اولوییتیم، شان شؤهرتیم
آدین منیم اؤز آدیمدیر ،سنسیز منیم نه قیمتیم

آزربایجان آزربایجان ،یاشا یاشا آزربایجان

 

مزاریندا یاتمیشدین اما بیرلیک یارادان میللی حرکت بایراغینی ، دوستلار نئجه ده اولسا مزارین اوستونه چاتدیریب دالغالاندیردیلار  ،ایندی بایراغیمیزی باغرینا باسیب دینج یاتا بیلرسن بی ییم.

سنه سؤزوموز اولسون بی ییم،اینان بیزه کی سنین گؤز ببه یین اولان آزربایجانی یئنی دن آباد ائده جه ییک ، سؤز اولسون کی ایسته دیین قورتولوشوموزو الده ائدیب یئنی میللی اگه منلییمیزی و دؤولتیمیزی قوراجاییق، سؤز اولسون کی یولونو داوام ائتدیره جه ییک.

بیز سنه غرورلاندیغیمیز کیمی سنده بیزه غرور دویاجاقسان، جیسمین یانیمیزدا اولماسادا اوجا روحون یانیمیزدادیر ای حسن آزربایجان.

 

بیشتر بخوانید

۲۷ آذر ؛ یکصدمین سالگرد جنگ بزرگ لکستان و مقاومت قهرمانانه مردم سلماس/ دکتر توحید ملک زاده

  از اوایل سال ۱۲۹۸ شمسی اکراد سیمیتقو حملات خود را شدت بخشیده و راه …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *