دوشنبه - ۲۶ اردیبهشت ۱۴۰۱
خبر فوری
خانه / مقاله / خمینی ایله واریثین صؤحبتی؛«ایران حزب‌الله زیندانیندا» رومانیندان / ائل اوجا آتالی

خمینی ایله واریثین صؤحبتی؛«ایران حزب‌الله زیندانیندا» رومانیندان / ائل اوجا آتالی

(بیرینجی بؤلوم / کؤچوره ن : ا.دیلمانلی)

زیندانلارداکی قیز اوشاقلارین باکیره لییی آلینسین سونرا اعدام اولسونلار!

(بو فتوانی خمینی وئردی)

۸۸ ین یاییندا پرزیدنتین صلاحیت لری محدودلاشدیریلدی و فرمالیته کاراکتئر داشییردی. اؤلکه نین بوتون ایداره چیلیک یوکو باش ناظیرین چیینینه دوشوردو. اصلینده ایراندا پرزیدنتین اولوب اولماماغینین بو اؤلکه نین داخیلی و خاریجی سیاستینه ائله بیر ایستی سویوغو دا یوخویدو. چونکو اؤلکه نین «آیت اللهی» ایسته دییی واخت ،پرزیدنتین صلاحیتین لغو ائدیب، اونو گؤره ویندن آلا بیلردی.

باخمایاراق کی، پرزیدنت اولوسون سس چوخلوغو ایله ،سئچیلیردی. نظره آلماق لازیمدیر کی، بو اؤلکه ده هامیدان ،هر کس دن یوخاری دا دوران بیر شخص وار، هامییا، هر کسه ده نظارت چی اودور. اونونلا راضی لاشمایان اؤز کله فین اؤز الی ایله کسمیش اولور.

بو دا آیت الله خمینی ایدی. ائله میر حسین موسوی یه اونون ائشیدن قولاغی و ووران قولو اولان اطلاعات دا، محض بو آغانین سایه سینده نفس آلیردی.

قورخو ایله تربیه اولونوب، اونون دیکته سی ایله حرکت ائدن، میللت دن فرقلی اولاراق، بو زامان حاکیم دایره لرین اؤزونده ده اعتراض نت لاری اوزه رینده یئنی نغمه چالینماغا باشلایانلار تاپیلدی. بو قانلی تاماشانین هانسی سونلوقلا قورتاراجاغینی گؤزله یه بیلمه ین تاماشاچیلاردان بیری ده ایمامین واریثی،یعنی، ایمام آیت الله خمینی دن سونرا، دؤولتین باشیندا دوراجاق شخص آیت الله منتظری ایدی. ایران آدلی بؤیوک صحنه ده اوینانیلان فاجیعه وی اثرین بو قدر اوزانماییب ،قات – قات پرده نین تئزلیکله یئره سریلیب تورپاغا گؤمولمه سی اوچون ایسته دی اؤزو ده صحنه یه چیخیب مثبت بیر رول اویناسین. اونا گؤره ده هر گون آوازلا اوخودوغو قرآن کریمی قولتوغونا ووروب ایمام خمینینین یانینا گئتدی. سالام کلامدان سونرا دئدی کی :

-آغا، اؤلکه قان ایچینده اوزور…

-آللاها قارشی موحاریبه اعلان ائتمیشلر، گرک جزالارینا چاتسینلار. بیز اینقلاب ائتمه میشیک کی آللاه سیزلارلا بیر اؤلکه ده یاشایاق ،او یاخشی بیلیردی کی، قوجا ایمامین آرزوسوندا اولدوغو کافیرسیز دونیادیر.

-آغا ،سون آیدا اعدام اولونانلارین ساییسی ۱۲۰۰۰ چاتیب،هله اوسته لیک ایرانین بوتون زیندان لاری دولودور.
-بونون نه ییندن قورخورسان، اوغول؟ قوی اولسون! گرک اول ایرانی کافیرلردن تمیزله یه ک، سونرا اینقیلابی قونشو اؤلکه لره یایاق! .
-اؤلوم گوجویله ؟
-یوخ، اذان سسی ایله…

قفیلدن ایمامین اوزونون تورشاماسیندان، واریث حیسس ائتدی کی، بو یؤنده گئدن صؤحبت اونا خوش گلمیر. اونا گؤره ده چالیشدی قونونو ده ییشسین. آغزینی دولدوروب دانیشماق ایسته ییردی ،لاکین سؤزو آغزینداجا قالدی. بو دفعه ده اوستا شاگیردینی قاباقلاییب سؤزونه دوام ائتدی :

-گرک اول جه شوروی لری ایمانا گتیرک. اوروسلار اونلاری کافیر ائدیبلر… یولونو آزمیش دونیانی یالنیز ایسلام کیمی مترقی بیر دین! خیلاص ائده بیلر. من اینانیرام کی، بیز بونا ناییل اولاجاییق.

یولوموزا اینانمایان بیزیم دوشمنیمیزدیر!
آللاهین دوشمنیدیر اونلار. ایسلام اینقیلابی آللاه طرفیندن سئچیلمیشلر اؤلکه سی اولان عاری لره نعمت کیمی گؤیدن گؤندریلیب.
قالدی موحاریب لر ،اونلار آللاها قارشی دیرلار ،اونو تانیمیرلار. بئله اولان حالدا ،آللاهی تانیمایانین بوینو وورولمالی ،هئچ یئرده ایزی قالمامالیدیر. ایز قالارسا ،آللاه سیزلیق یادداشلاردا کؤک آتار.
اوغول ،بیرده اونوتما کی، آللاه دان قورخمایان یولونو آزار.

-آللاها سئوگی ایله قوووشماق اولار.
-اینسانلار قورخماسالار ،سئوه مزلر.
-قورخو سئوگینی اؤلدورور. مقدس لیک اولوی دویغودور! اونا گؤره ده گرک اینساندا اولوی لیک آشیلانسین مقدس لییه قارشی. آما بو دقیقه اؤلکه ده باش وئرن حادیثه لر، بیزیم بؤیوک ایشیمیزه زیان وورور.

بیر آنلیغا گؤزله نیلمه دن ،ایمام قاشلارینی چاتیب، چاتیلمیش قاش آلتیندان گؤزلرینی اونا زیلله ییب :
-سن بو فلسفه نی هاردان اؤیرندین؟ – دئدی.
اونون گؤزله نیلمز سوالیندان واریث ده توتولدو و بیردن- بیره جیددیتینی آرتیراراق :
-سون آیداکی قتیل لرین تجروبه سیندن نتیجه آلدیم! – دئدی.

آیت الله سا علاوه ائتدی کی :
-بیز ایسلام اینقیلابیندا بیر یالنیشلیق ائتدیک :
ایمامین نه کیمی یالنیشلیق ائتدیینی و ان اساسی یالنیشینی اعتراف ائتمه سی واریث دن اؤته ری گؤزله نیلمز اولدوغو اوچون سوال ائتدی :

-آغا هانسی یالنیشی نظرده توتور؟
-گرک اینقیلاب دان درحال سونرا دار آغاجی قورایدیق.
چاشقینلیقدان اؤزونو ایتیرمیش واریث ،آنجاق :
-هاردا؟ – سوروشا بیلدی.
-هر یئرده… کوچه ده، بازار قاباغیندا، مئیدانلاردا، آداملارین گؤزو قاباغیندا، یاشاییش منطقه لرینین حیاطیندا، یونیوئرسیتئت لرین قاباغیندا…
هر یئرده بونلار اولمالیدی، بئله ائتسیدیک ،ایندی ایشیمیز آسان اولاردی، میللتی اؤز نظارتیمیزده راحات ساخلایا بیلردیک.

آنی اولاراق هر ایکیسی سوسوب بیر – بیرینین اوزونه باخدی. آنجاق یئنه سس سیزلییی بیرینجی پوزان منتظری اولدو.
-یالان معلوماتلا شرله نیب، زیندانلاردا یالنیشلیقلا اؤلدورولن لر ده چوخدور. آغانین بونا موناسیبتی نئجه دیر؟
بونو دئییب خمینینین فیکرینی اؤیرنمک ایسته ین واریث ،گؤزلرینی اونون آغزینا دیکدی. آنجاق ایمام نه دوشونوردوسه جاواب وئرمه یه تلسمیردی. بونو گؤرن واریث ایضاح ائتمه یه باشلادی :

آردی باشقا بؤلوم لرده اوخوجولاریمیزلا پایلاشیلاجاقدیر…

بیشتر بخوانید

دیلین و نیطقین تفکْورله علاقه‌سی 

تفکّور و دیل  دونیانی دیلسیز تصووّر ائتسک او آنلاییش‌لارسیز، مدنیت‌سیز اولاردی.­اینسان اونلار آراسیندا رابیطه  رولونو …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *