خبر فوری
خانه / آذربایجان / خورداد اولای‌لاری، تورک اویانیش سوره‌جی باخیمیندان / محمد رحمانی فر

خورداد اولای‌لاری، تورک اویانیش سوره‌جی باخیمیندان / محمد رحمانی فر

 

۱۳ ایل بوندان قاباق، ایران قزئته‌سینده یاییملانمیش بیر کاریکاتور بو اؤلکه‌ده یاشایان تورک‌لری خیاوان‌لارا چکدیردی. اوندان قاباقجا دا بو اؤلکه‌ده تورک‌لر دؤنه‌لرله آغیر توهین‌لرله قارشیلاشمیشدیلار. آنجاق، اوندان قاباقداکی توهین‌لر آذربایجانیمیزین آیری-آیری شهرلرینده یاشایان اینسان‌لاری، آرتیق آذربایجانیمیزدان قیراقدا یاشایان باشقا تورک سویداش‌لاریمیزی اعتیراض اوچون خیاوان‌لارا چکدیریب تؤکدوره بیلمه‌میشدی.

بورادا اؤنملی بیر سورغو اورتایا چیخیر: نه‌دن سؤزو گئدن کاریکاتوردان قاباقکی توهین‌لر، بئله بیر بؤیوک، بئله بیر گئنیش اعتیراض‌لا سونوجلانمامیشدیلار؟ سؤزسوز، خورداد اولای‌لارینین بؤیوک‌لویو هابئله گئنیش‌لییی قارشیلاشدیغیمیز توهینین آغیرلیغیندان آسیلی دئییلدی. دئدیییم کیمی، بیز اوندان قاباق، اوندان داها آغیر توهین‌لرله ده قارشیلاشمیشدیق.

آنجاق، ۸۵جی ایلین خورداد آیینا گلیب چاتینجا بیزلر لاپ آزی اون ایل‌لیک بیر اویانیش سوره‌جینی آرخادا قویموشدوق. بو اون ایلدن آرتیق سورن سورجده، بیر چوخ تورک‌لر اؤز کیملیک‌لری ایله، اؤز کئچمیش‌لری ایله، اؤز وارلیق‌لاری ایله… تانیشمیشدیلار. بو اویانیش سوره‌جینین سونوجو اولاراق، قاباقجالار شوونیزمین اویدوردوغو قوندارما تاریخ‌لردن دولایی، اؤز اؤزلویوندن اوتانیب اؤزونو اؤزگه گؤزلردن گیزله‌دن تورک‌لر بیر داها اؤزلرینه، کیملیک‌لرینه، کئچمیش‌لرینه، وارلیق‌لارینا گووه‌نمه‌یه باشلامیشدیلار.

اؤرنه‌یین، بیر زامان‌لار احمد شاملو کیمی‌ بؤیوک بیر شاعیر سوی آدینین تورک اولدوغونا گؤره، تاریخ قارشیسیندا اؤزونو باش آشاغی گؤرورموش. بو باش آشاغیلیق دویغوسونو، شاملو تک باشینا یاشامامیشدی. اونا تای چوخلو تورک‌لر ده شوونیزمین قونداردیغی یالانسی تاریخ‌لردن دولایی عؤمور بویو بو آجینی یاشامیشدیلار. بونا گؤره، من شاملونو هابئله اونا تای بیر چوخ تورکو قولای‌لیق‌لا قینایا بیلمه‌ییرم. بونلار، کیملیک‌لرینی یالانچی تاریخچی‌لرین اویدوردوقلاری قوندارما تاریخ‌لرده تاریخه تاپشیرمیشدیلار. بونلار، قینامالی اینسان‌لار دئییل‌میشلر، اورک یاندیرمالی اینسانلارمیشلار. بونلار شووونیزمین قوربان‌لاریمیشلار…

آذربایجانیمیزدا یئنی اویانیش سوره‌جی باش توتمایینجا، تورک کؤکن‌لی اینسان‌لاریمیزین چوخو اؤز کؤک‌لرینی دانماق پئشینده ایدیلر. آرتیق، اؤز کؤک‌لرینی دانا بیلمه‌ین‌لر ده، یاخود دانماق ایسته‌مه‌ین‌لر ده، سوی کؤک‌لرینه گووه‌نه بیلمه‌ییردیلر.

آنجاق، یوخاریدا وورغولادیغیم اون‌ایل‌لیک سوره‌سینده، باشدا پروفسور زهتابی کیمی بؤیوک بیر اوزمان اولماق‌لا، آذربایجانیمیزین بیر چوخ یازیچی-آراشدیرماچیسی تورک تاریخینی یئنیدن قورماغا یئنیدن تانیتدیرماغا جان آتمیشدیلار. بو چابالارین سونوجو اولاراق، قوندارما تاریخ‌لردن دولایی اؤز کیملیک‌لرینی دانان یاخود اؤز کیملیک‌لریندن اوتانان تورک‌لر، تورکون گئرچک تاریخی ایله تانیشمیشدیلار.

یوخاریدا دئدیییم کیمی اؤز گئرچک تاریخ‌لری ایله، اؤز گئرچک کئچمیش‌لری ایله، اؤز گئرچک وارلیق‌لاری ایله… تانیشان تورک‌لر نه تکجه قاباقکی آسیمیله اولموش تورک‌لر کیمی تورک اولدوق‌لارینا گؤره اوتانماییردیلار، بلکه بو دؤنه تورک اولماغی اؤزلری اوچون بیر باش اوجالیق ساییردیلار. بونا گؤره ده، خورداد اولای‌لاریندا تورک اولدوق‌لارینا گؤره باش آشاغیلیق دئییل، باش اوجالیق دویغوسو یاشایان تورک‌لر باش‌لارینی اوجا توتوب اوجا سس‌له “هارای، هارای من تورکم!” دئیه سس‌لرینی گؤیرلره چاتدیردیلار.

بو باخیمدان، خورداد اولای‌لاری آذربایجانیمیزدا تورک اویانیش سوره‌جینین اوغور قارانماسی آنلامینا گله بیلر. یوخسا، یوخاریدا وورغولادیغیم کیمی ایران قزئته‌سینین آشاغیلاییجی کاریکاتوروندان قاباقجا دا بو اؤلکه‌ده یاشایان تورک‌لر، اوندان داها آغیر اوندان داها آچیق توهین‌لرله ده قارشیلاشمیشدیلار. آنجاق، تورک اویانیشینین یوخلوغوندا او آغیر هابئله آچیق توهین‌لر تورک‌لری خیاوان‌لارا چکدیره بیلمه‌میشدیلر.

 

بیشتر بخوانید

امروز ۲۴ ژوئن ؛ هشتاد و یکمین سال روز تولد ابوالفضل ائلچی بی می باشد

  بیست و چهارم ماه ژوئن تولد رهبر بزرگ آزربایجان “ابوالفضل ائلچی‌‌بَی” می باشد. “ابوالفضل …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *