جنبش دانشجویی آذربایجان جنوبی
۱۳۸۵ – جی ایلین اوردیبهشت آیی‌نین ۲۲ – سینده «ایران» قزئتینده تورکلر علیهینه چَکیلَن توهینلی کاریکاتورا اعتراض اوْلاراق ۸ گون سوْنرا و خُرداد آیی‌نین بیرینجی گونو، تبریز شهرینده، گنج اؤیرنجیلردن توتدو دانشگاه اوستادی، معلّیم، ایشچی، تاجیر و عادی کسبه‌یه قَدَر یوز مین‌لرله اینسان، تبریز خیابانلاریندا توپلوم و مدنی اعتراضا ال آتاراق «ایران» گونده‌لیگینده، اوتانمادان و حیاسیز‌جاسینا میلیونلارلا تورک اینسانینا سرت حورمتسیزلیگی قیناییب اؤلکه مسئوللارینا و بوتون دونیایا اعتراضلارینی بیلدیردیلر.
تبریز اهالیسی‌نین شدتلی اعتراضیندان سوْنرا، اورومیه‌لیلر، اوْندان سوْنرا «سولدوز» (نقده)، قوشاچای، زنجان، خیاوْ، موُغان ، اردبیل و آذربایجانین باشقا شهرلری و حتّا تهراندا یاشایان تورکلر بو عمومی اعتراضا قوشولاراق آذربایجان میلّتینه توهین ائدَنلره و شوونیستی دوشونجه‌نی «ایران» قزئتی یولو ایله یایانلارا اؤز غضب‌لرینی گؤستردیلر.
تأسّف‌لر اوْلسون آذربایجانلیلارین بئله مدنی اعتراضلارینا و قانونی ایستَک‌لرینه گؤزله‌نیلمَز سرت جاوابلار وئریلدی و اوْنلارین مدنی اعتراضلاری آل قانلارینا بویانماقلا سونوجلاندی!
۱۳۸۵- جی ایلین خُرداد آییندا آذربایجان شهرلرینده‌کی اعتراضلار گؤستردی کی، آذربایجانلیلار اؤز حقلرینی دریندن دوشونَرکن، بو حقلرین تاپدالانماسینا و تورکلرین نسبی اکثریت اوْلوب اقلیّت حقوقوندان محروم قالماسینا بی‌تفاوت قالماغی و اوْنلارین هویّت و شخصیت‌لرینه توهین ائدَنلری جاوابسیز قویماغی جایز گؤرمورلر.
خُردادین بیرینجی گونوندن باشلایاراق یئددی‌سینه قَدَر و آردیجیل داوام ائدَن آذربایجان شهرلری‌نین اعتراضلارینی، یالنیز دؤلت اورگانی ساییلان «ایران» قزئتینده گئدَ‌ن حورمتسیزلیگه قارشی اعتراض آدلاندیرارساق، یانیلمیش اولاریق؛ بلکه بو گئنیش اعتراض، اوُزون ایللر و مختلیف یوللارلا اوْ جمله‌دن رادیو- تئلویزیون، مطبوعات، سینما، تیاتر، درسی و غیر درسی کیتابلار، چیخیشلار و باشقا جمعی ارتباط وسیله‌لری ایله آذربایجان میلّتی علیهینه اوْلان تحقیر و توهینلر نتیجه‌سینده آذربایجانلیلارین بوغازلاریندان قالخان نیفرت پوسکورتوسو ایدی!
خُرداد حادثه‌سی گؤستردی کی، آذربایجانلیلار دؤزوملو اینسان اولارکَن، اوْنلارین دؤزوملری‌نین حدّی- حدودو وار، اوْنلارین دؤزوم کاسالاری داشارسا اوندا داها اوْنلارین قاباغینی آلماق چتین‌دیر!
۱۳۸۵- ایل و خُرداد قیامی بیر داها ثابت ائتدی ایراندا شوونیستی و پان ایرانیستی سیاست ایله اؤلکه‌نی اداره ائتمک اولماز، بلکه ایران آدلانان اؤلکه‌ده یاشایان میلّت‌لرین دیل، مدنیّت، شخصیت و هویّت‌لرینه حورمتسیزلیک ائدیب فارسلاشدیرماق سیاستی یئرینه اوْنلارا سایغی و احترام گؤزو‌یله باخماق و اوْنلارین فرهنگی، مدنی، اقتصادی، اجتماعی حقلرینی اوْنلارا چاتدیرماقلا حقیقی بیرلیک و اتحاد یاراتماق مومکون‌دور.
دونیا دیللری ایله مقایسه‌ده ،دونیانین ان قانونلو دیللریندن اولان و دونیانین بیر چوْخ بیلیم یوردلاریندا تدریس اوْلان تورک دیلیمیز نهدن اؤز اؤلکه‌میزده ان آزینلیق (اقلیت) ساییلان ارمنی دیلی قَدَرده تدریس و تحصیل اولما حقّینه مالک دئیلدیر؟
بو اؤلکه‌ده هر بیر امکانی،یالنیز فارس دیلی اختیاریندا قویماقلا و هر بیر امتیازی یالنیز فارس میلّتی و فارس آدینا ثبت ائتمکله حقیقی و گئرچک بیرلیگه و اتحادا چاتماق اولارمی؟
ایران کثیرالمله بیر اؤلکه‌دیر، بو کثیرالمله اؤلکه‌نین انکیشاف و آبادلیغی اوندا یاشایان بوتون میلّت و قومیّت‌لرین حقلری‌نین قورونماسی و یاشادیغی یئرلرین و اوستانلارین آبادلیغی ایله مومکون اوْلا بیلَر.
تهران شهرینده ۲۰ تئلویزیون کانالیندان نئچه‌سی بو شهرین ان آزی یاری جمعیتی‌نی تشکیل ائدَن تورکلرین دیلینده برنامه یاییر؟
هانسی تئلویزیون سریاللاریندا تورک لهجه‌سی ایله دانیشان آدامی اجتماعی رفتاری بیلمه‌ین، یوْخسول و کوت بئیین یوخ، فیلسوف، پروفسور، دوکتور، مهندس و یوکسک مدنیّتلّی و یوخاری سویه‌لی شخصیّت رول‌لاردا گؤستریرلر؟
مگر بو اؤلکه‌ده تورک فیلسوفو، تورک دوکتورو و تورک مهندسی یوخدورمو ؟
آذربایجان اوستانلاری‌نین رادیو- تئلویزیونلاریندا نهدن برنامه‌لرین ۸۵% فارسجا و قالان ۱۵%ی ده اوزدن ایراق «فاذری!» دیلینده گئدیر و بو باصطلاح آذری دیللی برنامه لرین اتک یازیلاری نه دن تئلویزیون صحیفه‌سینده فارسجا یازیلیر؟!
نهدن درسی و غیر درسی کیتابلاردا تورک سؤزو و تورک آدینا حورمتسیزلیک و توهین ایله یاناشیرلار و نهدن آذربایجان اهالیسی آللاه بخش ائتمیش گؤزل طبیعته مالیک اوْلاراق، بو منطقه‌ده ایش مرکزلری‌نین یارانماماسیندان و اقتصادی دورومون آغیرلیغیندان عالی تحصیل آلمیش جاوانلاریندان توتدو عادی اینسانلارینا قَدَر ایش تاپماقدا تهران، اصفهان، شیراز، یزد، کرمان، مازندران و باشقا فارس دیللی شهرلرین یولوندا دیدرگین و سرگردان اولمالی‌دیرلار؟
نهدن ان آزی %۴۰ ایران نفسونو تشکیل ائدن و ایراندا جمعیت باخیمیندان نسبی اکثریته مالیک اوْلان تورکلر، حتّا ابتدایی مکتب‌لرده اؤز دیلینده درس اوخوماقدان محروم قالدیغی حالدا فارس دیلینی خارجه‌لیلره اؤیرتمک اوچون اجنبی اؤلکه‌لرین اؤیرنجی‌لرینه مملکت بودجه‌سیندن بورسیه وئریر و فارس دیلینی اؤیرتمه‌یه تشویق ائدیرلر و هر ایل فارس دیلی‌نین انکیشافینا گؤره سئمینارلار و توپلانتی‌لار قورولور و آغیر هزینه‌لرله خارجی قوناقلاری بو سئمینار و توپلانتیلارا دعوت ائدیرلر؟
نهدن ۱۴۰۰ ایلدن بو طرفه فارس دیلینده اؤزونه یئر آچان و هر کسین او سؤزلره عادت ائتدیگی و معناسینی بیلدیگی اسلامی- عربی کلمه‌لری قیراغا قویوب فارس معادلینی دوزلتمه‌یه میلّت جیبیندن هر بیر کلمه سینه میلیونلار تومن پول خرجله‌نیر آمما بیزیم کؤرپه‌لریمیز ساوادلی اولماغا و علم قازانماغا دونیانین ان قایدالی – قانونلو دیلی اولان اؤز آنا دیلینده یوخ، آغزیندا دولانمایان فارس دیلینده درس اوخوماغا مجبوردور!
خارجی سیاست‌ده‌ایسه اؤلکه مسئوللاری، فلسطین مظلوملاریندان حمایت ائده‌رکن تجاوزکار اسرائیل دؤلتینی رسمی دؤلت و اؤلکه تانیمادیقلاری حالدا نهدن دیلی، دینی، مذهبی، تاریخی و کئچمیشی بیزله بیر اوْلان اسلامی و شیعه اؤلکه‌سینی، یعنی آذربایجان جمهوریتی تورپاقلارینی اشغال ائدَن تجاوزکار ارمنستان دؤلتی ایله دوستلوق و اقتصادی امکداشلیق‌لارینی گونو- گوندن گوجلندیریر و بیر بیرلری ایله باجی – قارداشلیق ائدیرلر؟
بونلار و یوز‌لرله بونا اوخشار علت‌لر و آذربایجان میلّتینه قارشی تحقیر، توهین و عدالتسیزلیکلر آذربایجان اهالیسینی ۱۳۸۵- جی ایلین خُرداد آییندا ایران قزئتی‌نین توکلره ائتدیگی توهینی ایله خیابانلارا چکدی و گؤستردی کی، آذربایجانلیلار اؤلومه راضی اولارلار آمما تحقیر و توهینه، قول و برده کیمی یاشاماغا یوخ؛ اونلار سینارلار آمما اگیلمزلر!!
۲۵ اوردیبهشت ۱۳۹۸
