خانه / آذربایجان / خیرچادان کلیک اولسا، قارغادان ککلیک اولماز!

خیرچادان کلیک اولسا، قارغادان ککلیک اولماز!

ایره لی گئجه آنام گیلده زنگانین اشراق شبکه سیندن یایینلانان خبرلری ایزله ییردیک. آدینی «تورکو خبرلر!» قویدوقلاری بو تؤحفه وئریلیشین؛ تورکو یوخسا تورکجه ایله نه علاقه سی اولدوغونو باشا دوشمه سک ده، اجباری توفیق اولاراق گؤز-قولاغیمیزی اونا تاپشیرمیشدیق.

خبرلرین اورتاسینداکی گزارشلره نؤوبه چاتینجا، میکروفون آرخاسینا کئچن بعضی زنگانلی یورتداشلارین گولونج، نه تورکجه-نه فارسجا، آرا یئردن آوارا، قارماقاریشیق و آنلاشیلماز دانیشیقلاری؛ آنامدان ائشیتدیگیم اسکی بیر آتالار سؤزونو یادیما سالدی. آنام همیشه، اؤزونو ایتیره رک، اؤزگه لره بنزتمه یه چالیشان کیمسه لردن سؤز آچاندا دئیر:«قارغا ایستیردی ککلیک یئریشی¬نن یئریسین، اؤز یئریشینی ده ایتیردی!» منجه بئله بیر کاراکتئره مالیک اولان بعضی همشهریلریمیز، بو گؤزَل مَثَل اوچون عئینی بیر مصداق اولا بیلرلر.

بللیدیرکی تورکون زنگین دیلینی آتیب، یاد دیلینی توتان، شانلی تاریخیمیزی اوخویوب-اؤیرنمه دن، یادلارین اویدورما و افسانه قاریشیق تاریخینه بویون اگیب-فخر ائدن، تویلاریندا هابئله باشقا شنلیکلرینده روس خلقینین رقصینه اؤرنک اولان بنزرسیز تورک رقصینین یئرینه یادلارین ابتدایی رقصلریله مشغول اولوب-اگله نن و تپه دن دیرناغا فارسلاشماغا چالیشان کیمسه لر، بو سؤزه مصداق ساییلا بیلرلر؟ ایندی بو سؤزلریمی اوخویان بعضی اوخوجولار اؤز اورکلرینده منه «فضوللوغو سنه گلمه ییب، هرکیم اؤزو، اؤز صلاحینی و نتیجه ده نه دیلده دانیشاجاغینی، نئجه داورانیب-اوینایاجاغینی و نه لره فخر ائده جه یینی داها یاخشی بیلر!» دئسه لرده، یئنه ده سؤزومون اوستونده دایانماغی ترجیح ائدیرم.

چونکو گمی ده اوتوروب گمی نی دَلن کیمسه، تکجه اؤزونو یوخ، گمی ده ایله شن بوتون موسافیرلری بوغوب-اؤلدوره جکدیر! اؤز آنادیلی، تاریخی، هابئله کولتور، کیملیک و معنوی وارلیقلارینا خور گؤزله باخان و اونلارا لاقئید اولان آداملار، تکجه بیرینین یوخ بیر میللتین اؤلوب-آرادان گئتمه سینه سبب اولابیلرلر. بو اوزدن -خلقیمیزی اؤلومدن قورتارماق ایسته ییرکسه- یوخاریداکی اؤزللیکلره صاحیب اولان شخصلری، ایلک اؤنجه گولر اوزله قارشیلایاراق، دیل ایله یولا گتیرمه لی، یوخسا ایشلرینین قباحتینی بیلدیرمکله قینامالی و ان آزی اونلاری بو جبران اولونماز خطالارینا گؤره سایمامالی ییق. بئله بیر وظیفه نی یئرینه یئتیرمه سک و اؤز میللی بورجوموزو اؤده مه سک، ان قیسا زاماندا خلقیمیز ایله برابر یوخ اولمالی و وار-یوخوموزو، بیزی یوخ ائتمک مقصدینده اولان اؤزگه لره بوراخمالی ییق.

زنگانلی آرار

 

بیشتر بخوانید

اردبیل محروم – آذربایجان مظلوم  / اکبر آزاد 

هر خبری که، از اردبیل میرسد همیشه نگران کننده بوده و هست! یک روز خبر …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *