دوشنبه - ۳۱ خرداد ۱۴۰۰
خبر فوری
خانه / مقاله / زورلاما / ییلماز گونئی

زورلاما / ییلماز گونئی

آتا، بیر دفترخانا خیدمت‌چی‌سی ایدی، او مجبور ایدی چوخ آز امک حاقّی ایله بئش عایله‌نین یاشاییشی‌نی دولاندیرسین. اونون همیشه دانیشیق سؤزو بو ایدی: «زورلاما ایش گؤرورم».
بیر گون، گون اورتا چاغینا یاخین اونون اوشاغی گئتدی دفترخانادا آتاسی‌نین گؤروشونه. دفترخانا صاحیبی‌نین اوغلو دا اوردایدی، او ناهار یئییردی. او دا دفترخانا ایشچیسی‌نین اوغلو کیمی اون یاشیندایدی. آما اونون دولانیشیغی، داورانیشی بؤیوک آدام‌لار کیمین ایدی، اونون بو سایاق اولماسی امک‌لی قاضی آتاسینی خاطیرلادیردی.
دفترخانا صاحیبی‌نین اوغلو، آغزی دولو غذا، باشینی بوشقاب‌دان قالدیرمامیش ایشیچی‌یه دئدی:
ـ حیلمی بیگ … بیر لیوان سو گتیر!…
ایشیچی سویو گتیردی، دئدی: «بویوروز»
اوغلان یئنی‌دن دئدی:
ـ بیر آز دور، قوی تیکه‌می اودقونوم… اگر آدام غذاسینی یاخشی چئینه‌مه‌سه اونون قورساق‌لارینا ضرر وورار…
غذاسینی یاخشی چئینه‌دی، اونو اوددو، سونرا کاغیذ دسمال ایله آغزینی سیلدی، سونرا سویو آلیب، یاریمچیلیق ایچدی، دئدی:
ـ لیوان تمیز دئییل… لیوان‌لاری یاخشی یو!…
ایشچی‌نین اوغلو آتاسینی بو حالدا گؤروب چوخ ناراحات اولموشدو. او ایسته‌میردی بیریسی آتاسینا بیر بئله تاپشیریق وئرسین. دفترخانا صاحیبی‌نین اوغلو الینی ـ آغزینی کاغیذ دسمال‌لا تمیزله‌ییب سونرا دئدی:
ـ حیلمی‌بیگ… او میلچه‌یی اؤلدور.
ایشچی میلچه‌یی اؤلدوردو. او، اوغلانین غذا یئدییی میزین اوستونو ده تمیزلدی، گئتدی. ایشچی‌نین اوشاغی او دفترخانا صاحیبی‌نین اوغلونون الیندن چوخ حیرص‌لندییی اوچون دئدی:
ـ نه‌دن منیم آتام ایله بئله بیر داورانیشین واردیر؟
دفترخاناچی‌نین اوغلو یالنیز بیر سؤز ایله جاواب وئردی: «مجبوردور»
ـ نه‌دن مجبوردور؟
ـ مجبوردور!…
ـ نه اوچون؟…
اوشاغین آتاسی قاییتمیشدی، الینده بیر کؤهنه پارچا وار ایدی، دفترخاناچی‌نین اوغلو یئریندن قالخدی، دئدی:
ـ حیلمی‌بیگ، منیم پالتومو گتیر!…
اوشاق دئدی:
ـ آتا گتیرمه… قوی اؤزوگئدیب، گؤتورسون!…
دفترخاناچی‌نین اوغلو دئدی:
ـ آتان مجبوردور.
آتاسی بیر سؤز دئمه‌میش اوغلانین پالتوسونو گتیردی، اوغلان بیر عالی مرتبه‌لی دؤولت خیدمت‌چی کیمی پالتونو گئییب، قاپی‌دان ائشییه گئده ـ گئده دئدی:
ـ سن چیرک‌لی، تربیه‌سیز اوشاق‌سان.آتام گلنده بونلاری اونا دئیه‌رم.
خیدمت‌چی آتا، اونون قوللوغوندا باشینی اییب دئدی:
ـ بالاجا پاشا، منیم اوغلوما حیرص‌لنمه!… سن اونون قارداشی کیمی‌سن، اونون الیندن گرک ناراحات اولمایاسان.
اوغلان دئدی:
ـ سیز اؤولادینیزی یاخشی تربیه‌ ائله‌مه‌میسینیز.
آتانین آلچالدیلماسی اوشاغا چوخ تاثیر ائتدی. او اؤز ایچینده دئدی: «نمنه سبب اولوب‌دور کی، آتام بیر بئله بو بالاجا اوشاغین یانیندا کیچیلسین؟»
دفترخانا صاحیبی‌نین اوغلو گئتمیشدی، آتا دئییردی:
ـ اوغلوم، یاخشی ایش گؤرمه‌دین… اگر ارباب بوردا اولسایدی؟!…
اوشاق دئدی:
ـ آتا، سن نه‌دن مجبورسان؟ نه اوچون؟
آتا بوینونو اَیدی، دئدی:
ـ اونلارین بویوروق‌لارینا باخماسام، اونلارین قوللوقچولاری اولماسام، منی ایش‌دن ائشییه اؤتوررلر، من ایش‌سیز اولارام.
ـ سن ایش‌دن چیخسان نه اولار؟
ـ آج، سوسوز قالاریق، بیز مجبوروق اوغلوم!
اوشاق دئدی:
ـ آتا جان، به‌یم آیری ایش یوخ‌دور؟
آتا دئدی:
ـ هانسی ایشه ‌ده گئتسم، هئچ زاد فرق ائله‌مز، ارباب‌لارین هامیسی بیرـ بیری‌نین تایی‌دیر، بو اولماسین، او اولسون… بونلارین یانلیز آدلاری ده‌ییشیلیر، یوخسا اونلارین یارادیلیشی بیردیر، اونلار بیر ـ بیرلرینه اوخشاییرلار…
بیر حیرص‌لی، یونولمامیش سس گلدی:
ـ حیلمی بیگ…
آتا ۲۵ کوروش اوشاغا وئردی دئدی:
ـ اوغلوم … سن گئت ائوه.
اوشاق، کوچه‌ده گئدیردی، اونون اوره‌یی آجی دویغولار ایله دولموشدو، آما چوخ چالیشیردی کوچه‌ده‌کی، انسان‌لارین ایچینده بیلسین، هانسی مجبوردور، هانسی یوخ. ایسته‌ییردی گؤروسون اونلاری بیر ـ بیری‌سیندن آییرا بیلر می؟

چئویرن: محمود بنی‌ آدم

بیشتر بخوانید

نظام‌های حامی‌پرور و بحران مشروعیت / ابراهیم احمدپور

برخلاف تصور عموم که نظام‌های سیاسی، در دوگانه‌ی دیکتاتوری(اقتدارگرا) و دموکراسی خلاصه می‌شود، باید اذعان …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *