چهارشنبه - ۷ آبان ۱۳۹۹
خانه / آذربایجان / زیندان داغی / صادق کریمی (تیکان تپه دن)

زیندان داغی / صادق کریمی (تیکان تپه دن)

 

باتی (غربی) آذربایجاندا تیکان تپه شهری‌نین قوزئی دوغو یؤنونده یئرلشن آدی “زیندان داغی” ایله تانینان تاریخی- طبیعی جاذیبه‌یه گؤره قیسا بیر تانیتما.

ایچی بوش و کونوس فورماسیندا اولان “زیندان داغی” تیکان تپه شهری‌نین ۴۲ کیلومئترلییینده، یونئسکودا قئید اولونموش “سوغورلو مجموعه‌سی”‌نین باتی یؤنوندن ۳ کیلومئتر آرالی اولاراق، چوخ گؤزل، عجیبه، ماراقلی و حئیرتلی بیر جاذیبه‌یه یییه‌دیر.

آرخئولوگ‌لار بو کونوس فورمالی داغین مین‌لر ایل اؤنجه وولکان فیشقیرماسیندان عمله گلدییینی و آرزین بولاق‌لاری‌نین میلیون‌لار ایل‌لیک فعالیتی‌نین سونوجوندا اولدوغونو دئییرلر.

باشقا آرخئولوگ‌لارین باخیشی البته بئله‌دیر: داغ آرتئزیان ایستی بولاغی‌نین میلیون‌لار ایل‌لیک فعالیتی‌نین سونوجوندا اولان بیر اولای‌دیر، قایناغینی دا یئرآلتی سولار دئییبلر. بو نهنگ داغین یارانما نه‌دنی بولاغین ایلک‌ده بیر گؤل یارانماسی، گؤلون بؤیرونده اهنگ و باشقا مینئرال دوزلارین اولماسی، سویون آخماسی ها بئله یئنی‌دن چؤکمه‌سی‌دیر؛ اساس بولاق کونیک بیر داغ شکلینه گله‌نه قدر بو اولای اوزون ایل‌لر داوام ائدیر؛ داغین تیکیندیییندن سونرا بولاغین آغزی باغلاناراق، داغین ایچینده‌کی سو گئت- گئده آزالیر، داغ ایندیکی شکلینه چیخیر.

آیری آرخئولوگ‌لار و آراشدیریجی‌لار دا بئله اؤنری وئریرلر: داغین وولکانیزم تاریخی یوخ‌دور؛ داها دوغروسو ایلک‌ده بیر بؤیوک گؤل ایمیش، سونرا قورویوب بوگونکو حالینا گلدی.

بو داغین یان- یؤوره سینده هله ده چوخ‌ساییلی ایستی بولاق‌لار فعالیت گؤستریر و عمومیت‌له بو یئرلر چوخ مورکب و ژئولوژی یئرلردیر.

آوشار خالقی بو حئیرت‌لی داغ حاققیندا چوخلو افسانه‌وی ناغیل‌لار و حئکایه‌لر سؤیله‌ییرلر؛ داغین اطرافیندا اولان مینئرال سولارین دا معالیجه‌وی اؤزل‌لیک‌لره یییه اولدوغوندان دانیشیرلار.

تاریخ بویو تورک ماننالار (مین ایل میلاددان اؤنجه) بو داغین اتک‌لرینده یاشامیشلار.

بو داغین اوجالیغی بیتیشیک یئردن ۱۰۰ مئتره یاخین اولمالی‌دیر و مرکزینده دیامئتری ۶۵ مئتر، درین‌لییی ایسه ۸۰ مئتر اولان بیر چوخور وار. داغین ۸۵ مئتر هوندورلویونده، میلاددان قاباق مین ایل‌لره عایید اولان معمارلیق قالیق‌لاری، اوتاق‌لار، پیلله‌کان‌لار ها بئله تئراس‌لار گؤرونور.

۱۹۶۰-جی ایل‌لرده بیر آلمانیا آرخئولوژی گروپو، باغلانان داغ چوخورونون ایچری قورولوشونو اؤیرنمک اوچون قوزئی دوغو یاماجیندان بیر تونئل قازمیشدیلار، آراشدیرما ایش‌لرینی قورتاردیقدان سونرا تونئلی باغلادیلار.
بوگونه قدر بیر چوخ داغچی آدام‌لار داغچی‌لیق ایمکان‌لارینی ایشله‌ده‌رک داغین ایچینه ائنیبلر، او جومله‌دن ۲۰۱۸-جی ایلده ۳۲ یاشیندا اولان تیکان تپه‌لی ایدمانچی قادین ایلک قادین اولاراق داغین ایچینه ائنیب، چیخمیشدی.

بو داغین فورماسی و گؤرونوشو چوخ قورخونج‌دور و بورانی بیر نئچه دفعه ده گؤرن‌لر حئیرتلی و دهشت‌لی اولدوغونو دئییرلر.

بیشتر بخوانید

پاشینیان و مردم ارمنستان برای امتیاز دهی دردناک آماده اند!

اؤیرنجى : نیکول پاشینیان، نخست وزیر ارمنستان روز دوشنبه ۵ آبان از آمادگی خود و مردم …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *