دوشنبه - ۲۶ اردیبهشت ۱۴۰۱
خانه / آذربایجان / ساندویچ /غلامحسین ساعدی – چئویرن: عباس ائلچین

ساندویچ /غلامحسین ساعدی – چئویرن: عباس ائلچین

قاپی یاریمچیق آچیلدی. موشتری‌لر دؤندوکده ایری‌اوزلو اوجا‌بوی ، ائنلی‌کورک بیر کیشی گؤردولر؛ توتقون بیر گؤزلوک گؤزونه تاخمیش،  چال ساچلارینی اؤزنله دارامیشدی. قاپی آراسیندا دورارکن ساندویچ‌چی ایله تزگاهینی گؤزدن گئچیریردی.

سانکی تلفون آچماغا ویا بیر یئرین سالیغینی سورماغا گلمیش ایدی. دؤنوب گؤزآلتی یئیین-یئیین ساندویچ‌ یئین‌لره باخدی. ایکی کؤنوللو ایدی، نه قاییتماق ایسته‌ییردی نه ده ایچری‌یه گئچمک. سونوندا قاپینی ایته‌له‌ییب ایچری گیردی. اگنینده اولدوقجا یاراشیقلی سورمه‌یی پالتاری، آیاغیندا ایسه اینجه باشماق‌لاری وار ایدی. آغ بیر مندیلی بارماق‌لارینا ساریب بورمالاییردی. دوکانین کیفیرلیگیندن اورگی بولانمیش کیمی ایدی.

ایچریده‌کی‌لر سویودوجونون قاباغینا دوزلموش چارپایی‌لاری قیراغا چکیب یول آچدیلار. کیشی بیر نئچه یول وار-گل ائله‌ییب گؤزلوگون آرخاسیندان بیر-بیر آدام‌لارا، گَوشَین آغیزلارا  باخدی. بیر سوره دیوارین بوجاغیندا قالاقلانمیش یاغلی کاغیذ پارچالارینا، زیبیل قابینا گؤز تیکدی. دوکانچی سویودوجونون اوزه‌ریندن اگیلیب گولومسه‌یَرک،”‌بویورون جناب”-دئدی. هامی سوسوب کیشی‌نین آغیزینی آچیب نسه سؤیله‌مه‌سینی گؤزله‌دیلر. کیشی هامینی یوخلادیقدان سونرا گلیب سویودوجونون شوشه‌سی‌نین قاباغیندا دایاناراق دوزلموش یئمک‌لره باخماغا باشلادی. بیرآزدان بارماغی ایله ات قابینی گؤستره‌رک، “اتلرینیز تزه‌دیرمی؟”-دئیه سوروشدو.

دوکانچی گولومسه‌یَرک، “بلی جناب! بوگونونکودور”-دئدی.

“نییه رنگی یوخدور؟”-دئیه کیشی سوروشدو.

‌” یاخشی ات همیشه چؤهرایی رنگده اولار”-دئیه دوکانچی یانیت وئردی.

“کاباب حاضیرلامیسینیز می؟”-دئیه کیشی یئنه سوروشدو.

دوکانچی “بلی” دئیه‌رک اگیلدی بؤیوک بیر ات تاباغینی چیخاردیب سویودوجونون اوستونه قویدو. کیشی اگیلیب ایگله‌دی، سونرا مطبخین پنجره‌‌سینه بیر گؤز آتاراق دالی-دالی گئدیب شوشه‌نین آرخاسیندان یئمک قوْووران آشپاز کیشی‌یه باخدی. هله قرارینی وئرمه‌میشدی، اوزونو چیمچه‌‌ییش و ایگرنیش بوروموشدو. قاپی‌یا ساری گئتدی آنجاق بیردن دوشونجه‌سیندن یاییندی. دوکانچی‌یا، “بو کاباب‌لارین بیرینی منیم اوچون قیزاردین”-دئدی.

دوکانچی باشینی ترپدیب کاباب‌لاردان بیرینی گؤتوردو.

کیشی چیمخیردی: “‌ آغا الینله یوخ.. جناب الینله یوخ!”

دوکانچی ال-آیاغینی ایتیردی، گؤتوردوگو کبابی بیریانا بوراخیب کاغیذ مندیل ایله آیری بیر کاباب گؤتوره‌رک آشپازا ساری گئتدی.

کیشی دیگرلرینی گئری ایته‌له‌یرکن مطبخین پنجره‌سینه یاخینلاشیب آشپازا،‌ “زحمت اولماسا، اؤنجه بو تاوانی تمیزله‌یین، سونرا ساری‌یاغدا قیزاردین”-دئدی. آشپاز تاوایا بیرآز یاغ تؤکدو. یاغ قاینادیقدا او الینده‌کی کمچیک ایله یاغلاری تئز-تئز ییغدی؛ تاوا آغارمیشدی. دوکانچی بیر قالیب کره گتیردی؛ آشپاز کره‌نی تاوادا ازیب اریمه‌سینی گؤزله‌دی، سونرا اتی تاوایا آتدی. کیشی دوکانچی‌یا، “یاخشی بیر چؤرک آییرین”-دئدی. دوکانچی آغ بیر چؤرک چیخارتدی. کیشی، “تزه چؤرگینیز یوخدور مو؟” دئیه سورشدو.

 دوکانچی، “آغا! بونلارین هامیسی چوخ یاخشی‌دیر”-دئیه یانیت وئردی.

 “یاخشی قیزارمیش، یاخشی پیشمیش بیر چؤرک اولسون”-دئدی کیشی.

دوکانچی نئچه چؤرک پیشتاختانین اوستونه قویاراق “زحمت اولماسا، اؤزونوز سئچین”-دئیه قاش-گؤز ایله یئنیجه دوکانا گلیب ساندویچ‌ ایسته‌ین‌لره بیر نئچه دقیقه گؤزله‌مه‌لرینی آندیردی. کیشی چؤرک‌لری اندر-دؤندر ائده‌رک قیزارمیش بیر چؤرک سئچیب دوکانچی‌یا دئدی: “خمیرینی چیخاردین”.

دوکانچی چؤرگی آریدیب آشپازا آپاردی. کیشی یئنه آشپازین پنجره‌‌سی‌نین آردینا گئچیب، ‌”ایچینه هپیر-چوپور قویمایین”-دئدی. آشپاز باشینی ترپتدی سونرا کابابی گؤتورب یاواشجا چؤرگین آراسیندا قویدو.

کیشی ‌آرتیردی: “اوزه‌رینه  بیرنئچه دامجی لیمون سویو سوزون”.

آشپاز کابابین اوزه‌رینه بیرآز لیمون سویو تؤکدو، سونرا ساندویچی کاغیذا بوکَرَک بوشقابا قویوب کیشی‌یه طرف اوزاتدی. کیشی بوشقابی آلیب آپاردی دوندوروجونون اوستونه قویاندا،‌ ” نئچه ائله‌دی؟”-دئیه دوکانچیدان سوروشدو. دوکانچی گولومسه‌یَرک، “سیزین آغالیغینیزا دیر!”-دئدی.

کیشی کیفینی چیخاردیب بیر اون تومنلیک میزین اوستونه قویدو سونرا پنجره‌یه ساری گئدیب بیر ایکی تومنلیک ده آشپازا طرف اوزاتدی. ان سون دوندوروجویا ساری گلیب ساندویچی بوشقابدان گؤتوردو.

موشتری‌لر سس‌سیز-سمیرسیز ایشتاه ایله ساندویچ‌لرینی یئیرکن اونو ایزله‌ییردیلر. کیشی بیر نئچه یول دوکاندا وار-گل ائله‌دی. سانکی فیکری باشقا یئرده ایدی، چوخ اوزگون و قیزغین گؤرونوردو. سونرا بیردن گؤزو الینده‌کی ساندویچه دوشدو، غریبه بیر باخیشلا اونو سوزدو، سانکی الینده اؤلو بیر سیچان توتموش ایدی. تلَسیک دوکانین بوجاغینا گئدیب آیاغی ایله زیبیل قابی‌نین قاپاغینی قالدیردی، ساندویچی زیبیل‌قابی‌نین ایچینه آتیب دوکانین قاپی‌سینی آچاراق چیخدی ائشیگه.

بیشتر بخوانید

سرقت تابلوهای علائم رانندگی در آزربایجان غربی به ارزش ۸ میلیارد تومان

اؤیرنجی: سرقت علائم جاده‌ای در استان آذربایجان غربی باعث شده که این استان با بحران …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *