پنج شنبه - ۲۸ تیر ۱۳۹۷
خانه / آذربایجان / سنه آتیلان داشلار،مانقوردلارین مزار داشی اولاجاقدیر / جواد رنجبر

سنه آتیلان داشلار،مانقوردلارین مزار داشی اولاجاقدیر / جواد رنجبر

سنه بیر داش آتار یئریندن دوران
سنی سئودیکلرین داش قالاق ائیله ر
بیر الینده داش وار بیرینده قورآن
داش آتان بیلیر می نه گوناه ائیله ر؟
(رامیز رؤوشن)

بو گونلر بوتون شخصی وارلیقلارینی، میلی حرکتیمیزین یولوندا قوربان وئرمیش میللی فعال لاریمیزا، آزربایجان میللی حرکتینده بیر زامان اولوب و اولمامازلیقلارینا باخمایاراق ؛ آنجاق بوگون مانقوردلاشمیش بیریلری وریندن آپاریلان آماجلی و یؤنتیلمیش آشاغیلامالارین شاهیدی اولموشوق و بو اؤزلویونو ایتیرمیشلر، وطن ایگیدلریمیزین توتساقلاردا توتوقلانیب یوخلوقلاریندان فایدالاناراق اونلارا اولوب قالمایان اتهاملاری ووروب گؤزلرینی یوموب موندار آغیزلارینی آچدیقلاری ،رامیز رؤوشنین رحمتلیک اؤنده ریمیز ائلچی بی حاققیندا یازدیغی بو شعرینی منه خاطیرلاتدی.

آخی نئجه اولا بیله ر؛ میللتین و وطنین اوغروندا دوشمن له موباریزه آپاریب، توتوقلانیب دوشمن طرفینده ن سورغولانیب ایشکنجه اولدوغوندا، ائله جه سینه اوغروندا ساواش آپاردیغین آزربایجان میللتینین مانقوردلاری طرفینده ن ده سورغولانیب ،مظلومیتین زیروه سینه چاتاسان؟!

گرچک دن ده بوگون، عباس بی لیسانی گونئی آزربایجان تورک میللتینین و داها اؤنملیسی یاشادیغیمیز عصرین قهرمان کورشادی اولدوغو کیمی ائله جه ده میللتیمیزین مظلومیت سیمگه سیدیر.

عباس بی لسانی و ۱۰۰ نفره یاخین ایگیدیمیز، میلتیمیزین اؤزگورلویو و دئموکراتیک حاق ایستک لری اوغروندا توتوقلانیب قدار فارس شوونیزمینین توتساغیندا روحی _ روانی و فیزیکی ایشکنجه لر آلتیندا اولوب دیره ن دییی زامانلاردا بیرنئچه کیملیکلری بلیرلی و گاهدان بلیرسیز بیریلری طرفیندن یؤنلندیریلمیش ایفتیرالار ،آنلاشیلماز دوروملار یارادیب و میللتیمیزین حاق سسینی بوغماغا چالیشانلارین گده لیک لری ایله، آزربایجان میللی حرکتینین گوجلو ایره لی له مه سینین قارشیسیندا چالیشماقلاری آیدیندیر.

میللی قهرمانیمیز “عباس بی لیسانی “نین بو چتین زامان ایچینده یاشادیغیی بو وضعیت هئچ ده غریبه اولماییب بلکه زامانیندا بو حال لاری اولو اونده ریمیز “ابولفضل ائلچی بی” ده یاشامیشدیر .

یادیمدان چیخماز نعمت پناهلی نین ابولفضل ائلچی بی یی جاسوس ،روشوت یئیه ن و … آدلاندیردیقلاری .
هر زامان دا اوتانمادان بیر سندلر اوزه چیخارداجاغیندان سؤزلر آچمیشدیر !
آنجاق رحمتلیک بی یین روحونوندا بئله بیر چیرکینلیکلرده ن خبری یوخویدور،هاردا قالسین کی بیری لری ووردوقلاری بوش اتهاملارین سندلرین چیخاردا بیلسینلر.

ائله همان بو پناهلی آزربایجانین ایستیقلالیندا ائلچی بی یه یاخینلاشدی، دئمه ک کی ائلچی بی دن اونون شخصینه فایدا توخونمایاجاقدیر، او اساسدا حیدر علییئوه یاخینلاشیب بیر سیمت لره صاحاب اولدو، آنجاق تاماهکارلیقلار دویورا بیلمه دیی اوچون اونونلادا ترسینه باشلادی و توتوقلانیب بیر نئچه ایل زیندانا دا گئتمیشدیر.
ائله بو سیخینتیلاری یاشادانلار زامان بویو میللی ایراده نین قارشیسیندا دایانیب، کئچمیش ده نئجه کی ائلچی بی لری تخریبلره معروض قویوبلار، ائله بو گونده لیسانی لره بو چیرکینلیکلری یاشادیرلار ،آنجاق اؤنملی اولان میللتیمیزین هر زامان قهرمانلارینا آرخا چیخدیقلاری اولموشدور.

رحمتلیک ابولفضل ائلچی بی یه بیر ایل دؤولت باشیندا اولدوغو و پرئزیدئنتلیک ائتدییی زامان چئشیدلی قه زئتلرده، میتینگ لرده، توپلانتی لاردا و … ده اولوب قالمایان ایفتیرالاری ووروب و گاهدان همان موخالیفلر اؤلکه ایچینده یایملانان قه زئتلرده بی یین عاییله سینی هدفه آلاراق چیشیدلی آشاغیلامالارا باشلادیلار.
ائله بو تخریبلر بی یین ایقتیداردان گئدیب، موخالیفت اؤنده ری اولدوغو زامان و دئمه ک بوگون بی ایللر بویو تانری رحمتینه قووشدوغوندادا بیر سیراسی یئرینده دیر.

آنجاق اولو اوندر ائلچی بی ،بیر نفر آزربایجان وطنداشینین قانینی تؤکمه یه راضی اولمایاراق پرئزیدئنتلیی کودتا ایله حیدر علییئوه وئردی، بی اوگوندن سونرا بیر موخالیف پارتیاسی باشچیسی اولاراق عؤمرونو سون نفسلرینه دک، باش اوجالیقلا آزربایجانی و تورک میللتیمیزین حاقلارینی ساوونماقلا کئچیردی.

رحمتلیک ابولفضل ائلچی بی اقتدار دا اولوب اولمادیغی آنلاردا بئله، بو قده ر توهین لره و افترالارا معروض قالدیغی اوچون هئچ بیر وطنداشین علیهینه بیرجه شیکایتی ده اولمامیشدیر ، او قده ر قه زئتلرده عاییله سینی آشاغیلایانلارا بئله بیر شکایت ائتمه میشدیر.

بی هر زامان،آزربایجان میللتینین میللی اگمنلیینی بوتؤو آزربایجان دا یئرلشدیرمه ک ایسته ییب و وار گوجو ایله دئموکراسینی ساوونموشدور، ائله بونون اساسیندادا هر زامان دئییردی؛ من بو میللت اوچون ،بو وطنداش اوچون چالیشیرام و بو میللته اگمنلیک و دئموکراسی ایسته ییرم ، بو میللت دن نئجه شیکایتچی اولا بیله رم کی؟
دئدیلر بی سنین دوشمنین ده چوخدور،آنجاق بی دئدی: من پارا دئییلم کی هر کیمسه منی سئوه بیلسین.

ابولفضل ائلچی بی ییمیزین بو آجی آنلارینی و دئموکراتیک قرارلارینی وورغولاماقدان عباس بی یین بوگونکو دورومونو آچیقلاماق ایسته ییرم.

رحمتلیک ائلچی بی یه اولان افترالارین چوخو، آزربایجان جومهوریتی قورولدوغوندان سونرا باش وئرمیش و ائله جه سینه قوزئی آزربایجانیمیز موستقیل بیر اؤلکه و جومهوریت اولاراق تانیملانمیشدی و دئموکراسینین آزاد آزربایجانیمیزدا استقرار تاپماسی داها اؤنملی بیر قونویدور.
ائلچی بی ایسه گرچک دن ده بو داورانیشلاریلا، میللتیمیزه دئموکراسی تمرینی وئردی.

آنجاق بوگون عباس بی لیسانی اوچون اولان حاقسیزلیقلار ، دئموکراتیک قوراللاردان، اینسانی و اخلاقی قوراللاردان ایسه اوزاقدیر و بو دورومدا بو چیرکین تخریبلره باشلایانلار هئچ ده بو میللت اوغروندا چالیشان بیری لری اولا بیلمه ز لر .

میللی قهرمانیمیز، توتساقلاردا فارس شوونیزمی باسقیسی آلتیندا توتوقلانیب ایشکنجه لره معروض قالدیغی زامانلاردا و ائله جه عباس بی اؤزگورلوک ده اولا بیلمه دیی و اؤزونو ساوونا بیلمه دیی آنلاردا بئله اونو اخلاقسیزجاسینا وورماق ائله مانقورد اولوب فارس شوونیزمینه قوللوقچولوقدور.

عباس بی ایلک میللتیمیز و وطنیمیز آزربایجانین و ایکینجیسی اؤز اینسانی حاقلارینی شوونیسم سورغوچولارینین ایشکنجه سی آلتیندا ساوونوب محکمه ده ن اؤزگورلوک قرارینین آلماسینی گؤزله دیی آنلاردا، دوشمنین اوستونه آتدیغی سوچلاردان اؤزونو ساووندوغو آنلاردا ؛ بیریلرینین ایران محکمه لرینه و باسقیجی قووه لرینه یالاندان بیر دئیتایلار وئریب، دیشاریدان مالی دستک آلماسی نه آنلاما گله بیله ر کی؟

بو سوچو عباس بی یین اوزه رینه آتماق تکجه ساتقینلار، مانقوردلار وریندن بو ایگیدیمیزین فارس شوونیزمی وریندن داها آغیر جزالاندیردیغی نییتی ایله اولا بیله ر.

بو آداملار عباس بی یین اؤزگورلویوندن قورخورلار چونکو گونئی آزربایجانین ایچه ریسینده اولونان بوتون مدنی چالیشیقلاردا هر زامان عباس بی لسانی نین آدی واردیر و وار اولاجاقدیردا ؛ عباس بی وار اولدوغو سوره جه ده آلوئرچیلرین حرکت ده رولو یوخدور و اولمایاجاقدیر.

لسانی آدی وار اولدوقجا دیشاریدا کودلرله، پهلوی لرله و وطنیمیزین دوشمنلری ایله آلوئر ماساسیندا اوتورانلارین اللریندن بئله بیر فورصت لر آلینیب و بو قوروملار یا شخص لر ،اؤز سوچلارینین اتهامیلا باشقالارین سوچلایا بیلمه یه جک لر.

عباس بی یین میللتیمیز طرفیندن قهرمان گؤروندویو و سئویلدیینین رمزی ده ائله بوندادیر ؛میللتینین حاققینین بیر ذره سینی جانینین باهاسینا بئله موعامیله ائتمه ین بیر ایگید دیر و نه قده ر میللت وریندن سئویلیرسه ده او قده ر ده میللتیمیزین دوشمنلری وریندن تاپدالانماق و تخریبلره معروض قالاجاقدیر.

دوغرودور عباس بی رحمتلیک ائلچی بی ییمیز دئمیشکه ن ؛پارا دئییل کی هر کس اونو سئوه بیلسین، سیز مانقوردلار آنجاق دوشمن پاراسینی سئویب جیبلریزی دولدوروب عباس لیسانی لری تخریب ائده بیلرسیز.

آنجاق عباس بی ه آتدیغینیز هر بیر داش ، ایگید قهرمانیمیزین میللتیمیز آراسیندا سئویلدیینی آرتیرار و ائله جه او داشلار میلتیمیز طرفیندن مانقوردلارا مزار داشی و قهرمانلاریمیزا قورولموش سارای داشی اولاجاقدیر.

بیشتر بخوانید

قوتادغو بیلیگده دؤولت فیکری

اؤزت        بالاساغونلو یوسوف طرفیندن ۱۰۶۹/۱۰۷۰ ایللرینده قلمه آلینمیش اولان قوتادغو بیلیگ، تورک دؤولتی’ نین …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *