چهارشنبه - ۲۲ مرداد ۱۳۹۹
خبر فوری
خانه / آذربایجان / سیزین خئیرینیزی ده ایسته‌مه‌دیک، شررینیزی ده / محمد رحمانی فر

سیزین خئیرینیزی ده ایسته‌مه‌دیک، شررینیزی ده / محمد رحمانی فر

 

دئمیشلر: “بیر ایشی گؤرمک اوچون بیر دلیل آختارماق گرکیرسه، او ایشی گؤرمه‌مک اوچون مین بیر ماهنا تاپماق اولار!”

دیلیمیزین دوشمن‌لری بیزیم ایستک‌لریمیزله قارشیلاشدیقلاری زامان، بو ایستک‌لره قارشی اولدوقلارینی آچیقجا دیله گتیرمکدن چکینه‌رک انتیقه-انتیقه ماهنالار اورتایا قویورلار.

تبریز بیلیم‌یوردوندا اؤیرنجی اولدوغوم زامان، نئفتین چوخ چوخ اوجوزلاشماسیندان دولایی، ایرانین مالی دورومو چوخ کؤتو ایدی. بونا گؤره، بیزلر آنا دیلیمیزین درس وئریلمه‌سیندن سؤز آچدیغیمیزدا، قارشی طرف، ایرانین کؤتو دورومونو خاطیرلاداراق “گؤرمورسوز مملکت نه وضعیت‌ده‌دیر؟ هانسی بودجه ایله تورکو کیتاب‌لاری چاپ ائدیب بو دیلی درس وئرجکلر؟!” دئیه، بیزلری سوسدورماغا چالیشیردیلار.

بو سورغولارین جوابیندا گاهدان دئییردیک: “ائله مملکتین بو کؤتو دوروموندا دا، دؤولت فارسجانی اونوتمامیش. نه تکجه فارسجانی قوروماق اوچون مختلف اورقان‌لارا بؤیوک بؤیوک بودجه‌لر آییریر، بو دیلی باشقا اؤلکه‌لره یایماق اوچون ده میلیون‌لارجا کیتاب فارس دیلینده چاپ ائتدیریب افغانستان ایله تاجیکستان کیمی اؤلکه‌لره گؤندریر. آرتیق، چین دؤولتی الینده اسیر دوشن اورومچو تورک‌لرینه ده بو کیتاب‌لاردان گؤندریر!”

آنجاق، دئدیییم کیمی، ماهنالار قورتولاسی دئییلدی! هر بیر سؤزه مین بیر ماهنا ال‌لرینده وار ایدی! بیرگون یولداش‌لارین بیری گؤزل بیر سؤز دئدی: “تورکو کیتاب‌لاری چاپ ائدیب، تورکجه‌نی درس وئرمک اوچون، لازیم دئییل دؤولت بودجه دالیجا اولا! ائله دیلیمیزی آرادان آپارماق اوچون خرجله‌دییی پول‌لاری، دیلیمیزین کیتاب‌لارینا و تدریسینه خرجله‌سه یئتر!”

ایندی او سؤزلردن دوز ییرمی ایل کئچیر. آرخایا باخیرام دا هئچ نه‌ دییشمه‌میش کیمی گؤرونور. آنجاق، بوتون بو ایل‌لرده، فارسجا اوچون آیریلان بودجه‌نین، ایلی ایلدن چوخالماسینی هامی بیلیر. سؤز قونوسو تورکجه‌میز اولدوقدا “آش همان آش، کاسا همان کاسا” دئمک ایستردیم.  آما کئشکه “آش همان آش، کاسا همان کاسا” اولسایدی!

اصلینده، هر ایل ایران بودجه‌سینده فارسجانین پایی چوخالدیغی کیمی، تورکجه‌نی آرادان آپارماق اوچون آیریلان بودجه ده ایلی ایلدن چوخالماقدادیر. بو چیرکین پول‌لار “وطن یولی” کیمی، “آذری‌ها” کیمی، “ایرانشهری پروژه‌سی” کیمی آنتی‌تورک درنک‌لرین فیریلداقچی دولاندیران‌لارینین آراسیندا پایلانماقدادیر.

بیر داها ییرمی ایل بوندان قاباغا قاییدا بیلسه‌ایدیم: “آنا دیلیمیزی قورویوب گلیشدیرمک اوچون نه فارسجایا آییردیغینیز بودجه‌لری ایسته‌ییریک، نه ده تورکجه‌نی آرادان آپارماق اوچون خرجله‌دییینیز پول‌لاری! اونلارین هامیسی سیزین اولسون! یئتر کی بیزی اؤزوموزه بوراخاسینیز! یئتر کی اؤز پولوموزلا آنا دیلیمیزده کیتاب یاییملایان ناشیرلرین قاپی‌لارینی باغلامایاسینیز! یئتر کی، اؤز پولوموزلا اوجقار کندلریمیزده کیتابخانا آچان ایگیدلریمیزی توتوقلاماسینیز!” دئیردیم!

بیشتر بخوانید

نقوش آجواج ( مربوط به حدود ۳۵ تا ۱۵۰ هزار سال قبل) سلماس

در نزدیکی روستای آجواج ۱۶ کیلومتری جنوبغرب سلماس آثاری از انسانهای اولیه وجود دارد که …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *