خانه / آذربایجان / یاز گلیر شاختانین جانین آلماغا / دکتر لطیف حسنی

یاز گلیر شاختانین جانین آلماغا / دکتر لطیف حسنی

گئجه- گوندوز آرا وئرمه دن ساواشیب جانینی بوروین پولاد کیمی برک، اورک سیخیجی زنداندان قورتاردیقدان سونرا نه قازانمیشدی؟ قارانلیق، قاتی قارانلیق. اوسته لیک بو قارانلیقدان قات- قات آرتیق اونون آمانینی کسه ن بوم_بوز تورپاق؛ اوجو-بوجاغی بللی اولمایان بیر زندان کیمی اونو چولغالامیشدی. هر یانا سوسقونلوق و دورغونلوق حؤکوم سوروردو.

جانی برک اوشویوردو. دؤنوب بیر، جیلیز، یوموشاق و اینجه گؤوده سینه (ساپینا) باخدی؛ بیرده قارشیسندا هریانی بوروین سویوق تورپاغا.

بونون سونو نه اولاجاقدی؟-دئیه اؤز-اؤزوندن سوردو.
آخی، وارلیق بو قدر سویوق و قارانلیق اولمامالیدی. ان آزی یوخولاریندا گؤردویو دونیا تام باشقا بیر دونیایدی. یوخولارینداکی دونیا داها ایشیق، داها ایستی و حیاتلا قایناشان گؤزل دونیایدی. تورپاقدا بو قدر اوزو سویوق دئیلدی.

بونلاری دوشونه- دوشونه درین بیر یوخویا گئتدی. یوخوسوندا اؤزونو تورپاغین قوجاغیندا گؤردو. تورپاق ایسه داها مهریبان ،داها ایستی اونو برک-برک جانینا سیخاراق قولاغینا پیچیلدادی: “منه باخ بالاجا! مندن اینجیمه. من تورپاغام؛ سنین آنان. سن اؤزونو بو ظلمتدن قورتاریب، آزادلیغا چیخماق اوچون یالنیز منده کؤک آتمالیسان. من بو آن میلیاردلارلا سایا-حسابا گلمه ین سنین کیمی لری اؤز بطنیمده داشیماقدایام. هامیسی دا سنین کیمی داریخیب، وورنوخورلار. بیرده بو سویوقلوق مندن یوخ؛شاختاداندیر. شاختا ایسه بوتون بیتکی لرین قاتی دوشمنی دیر. او، گیردیی باغ- باغاتدا سویقیریم تؤره دیر. من سنی اؤز بطنیمده بو دوشمندن قوروماقدایام. بونودا بیلمه لیسن کی، شاختانین جانی قیشا باغلیدی. ایندی ده بو آن، ائشیکده ” یاز”لا “قیش” آراسیندا بؤیوک بیر ساواش گئدیر. بو ساواشدا قیش یئنیلمه لیدی. قیش یئنیلدیکده ایسه جانیمیزا دولان شاختا ارییب یوخ اولاجاق. بودا سنین آزادلیغین دئمکدی. آنجاق او گونه دک سن داریخمامالی، اومودونو ایتیرمه مه لی بیرده دؤزوملو اولماغی باجارمالیسان.”

یوخودان آیلدیقدان سونرا، او یوخونون سئوینج حیسسی هئچ بیر زامان اوندان آیریلمادی. اوسته لیک بو سئوینج دن ایچینده بیر ایسینمه حیسسی ده یارانمیشدی. آرتیق، نه شاختادن چکینیردی نه ده قارانلیقدان. بیر طرفدن تورپاقدا کؤک آتاراق، باشقا طرفدن ایسه اوز-گوزونو تورپاغا سورته رک، سئوه- سئوه اوزو ایشیغا دوغرو جوجرله مه یه باشلادی. گئت-گئده تورپاقدا یوموشالماقدایدی.
و نهایت اون- اون بئش گوندن سونرا تورپاقدان چیخیب شاختایلا اوز- اوزه، گؤز-گؤزه، سؤز-سؤزه گلدیلر.
آنا توپراق دایاغیدیرسا کیمسه یه یئنیلمه یه جیندن آرخاین ایدی. ائله بو آرخاینلیقدان آرتان گوجویله ده شاختایا یئنیب،آزادلیغینی قازاندی.

آزادلیغا چیخدیقدا اؤنجه اؤرتویونو باشیندان آتیب؛ گؤزل لچکلرینی گونشین قیزیل شعارلاریندا سیلکه له دیکدن سونرا،اونون گؤزل لیگی قارشیسیندا یاواش – یاواش گیریله ین شاختایا اوز توتوب دئدی: شاختالار تورپاغی دوندورسا بئله،قات – قات بوز اوسته قوندورسا بئله گئجه لر ظلمتین اؤدو داغیلسا،قورخودان باغریلار چات- چان یاریلسا،
یاز گلیر شاختانین جانین آلماغا.

بو گؤزل یاز بایرامینی گونو- گوندن سؤفره سی کیچیلن و یوخسوللاشان گونئی آذربایجان میللتینه؛ میللتمیزین یاریسیندان آرتیق میللی آیری سئچکیلیگه یاناشی جنسی آیری سئچکیلنلیگه معروض قالان گونئی آذربایجان قادینلارینا؛ اوتایلی – بوتایلی آذربایجانین قاچقینلارینا،کؤچکونلرینه و نهایت جمهوری اسلامی رژمینین تورمه لرینده دوستاقلانان سویداشلارمیزا تبریک دئییرم.
گون او گون اولسون بیرلیکده میللی آزادلیق بایرامینا چیخاق.
لطیف حسنی ۱۳۹۷ بایرام آیی.رجایی شهر تورمه سی

بیشتر بخوانید

قابلیت‌های شگفت‌انگیز زبان تُرکی و آرزوهای برباد رفته پان‌فارسیسم / محمد رحمانی فر

  قابلیت‌های شگفت‌انگیز زبان تُرکی و گستره فرامنطقه‌ای آن، چیزی نیست که به مذاق دشمنان …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *