چهارشنبه - ۲۸ آذر ۱۳۹۷
خانه / مقاله / یاشاسین ایراندا یاشایان تورک اولوسلاری(تورک ملتلری) / اکبر آزاد

یاشاسین ایراندا یاشایان تورک اولوسلاری(تورک ملتلری) / اکبر آزاد

ایران چوخ اوُلوسلو (چوخ ملّتلی) بیر اؤلکه دیر. دیل و کیملیک اعتباری اساسیندا بو اولوسلار ایکی اساس قولا بؤلونورلر:

۱-ایراندا یاشایان تورک دیللی اولمایان اولوسلار:
ایراندا یاشایان تورک دیللی اولمایان اولوسلارین ان تانینمیشلاری بونلاردیر: عرب، فارس، کورد، بلوچ، گیلک و لور(تأسف له گیلک و لورلارین بؤیوک بیر حصه سی فارسلارین نفعینه آسیمله اولوبلار و یا آسیمیله اولماق آستاناسیندا دیرلار) و…

۲- ایراندا یاشایان تورک دیللی اولوسلار:
ایراندا یاشایان تورک دیللی اولوسلارین (ملّتلرین)ان تانینمیشلاری بونلاردیر:

آذربایجان تورک ملتی: آذربایجان تورکلری عمده شکیلده ایران آدلانان سیاسی جوغرافیانین قوزئی غربینده یئرلشن اراضیدن باشلاناراق ایرانین قوزئی و مرکزینه قدر یاییلمیش اراضی ده یاشاییرلار. بونلار عمومیت اؤزلرینی « تورک » و وطنلرینین آدینی «آذربایجان» بیلیرلر.

تورکمن ملّتی: تورکمنلر عمده شکیلده ایران آدلانان سیاسی جوغرافیانین قوزئی و قوزئی شرقینده یئرلشن اراضیده یاشاییرلار. بو تورکلر اؤزلرینه «تورکمن» و وطنلرینه «تورکمن صحراسی» ویا «تورکمنستان» دئییرلر.
خوراسان تورک ملتی: خوراسان تورکلری عمده شکیلده ایران آدلانان سیاسی جوغرافیانین شرق و قوزئی شرقینده یئرلشن اراضیده یاشاییرلار. بونلار اؤزلرینی «تورک» و بعضا «تورکمن» آدلاندیریرلار؛ وطنلرینین آدی دا «خوراسان» دیر!

قاشقای تورک ملتی: قاشقای تورکلری عمده شکیلده ایران آدلانان سیاسی جوغرافیانین مرکز، گونئی و گونئی غربینده یئرلشن اراضیده یاشاییرلار. اصفهان اراضیلریندن باشلاناراق سومئر ویا کنگر کؤرفزینه(خلیجینه) قدر یایغین اولان اراضیده یاشاییرلار. بو اراضی حدوداً ۸ اوستانین ترکیبینده یئرلشیر. بونلار اؤزلرینی « قاشقای تورکو» و اؤلکه لرینی «قاشقایستان» آدلاندیریرلار!

خلج تورک ملتی: خلج تورکلری نین جمعیتی محدود و تخمینا ۳۰۰ کند و قصبه و بعضی شهرده یاشاییرلار. یاشادیقلاری اراضی حدودا ایرانین مرکزینده یعنی قم، مرکزی، همدان و اصفهان اوستالاری نین ترکیبنده دیر. باخمایاراق کی،خلجلر دیل باخیمیندن اسکیلرده یاشایان تورکلردن یادقار قالان بیرجمعیت دیر. آنجاق تأسفلر له خلج تورکلری نین بؤیوک بیر حصه سی فارسلارین نفعینه آسیمله اولوبلار و یا آسیمیله اولماق آستاناسیندا دیرلار.) بونلار اؤزلرینی «خلج تورکو» و وطنلرینی «خلجستان» آدلاندیریرلار!
و…..

ایراندا یاشایان جمعیتین سایی نین ۸۰ میلیون اولماسی رسماً اعلان و بللی اولسا دا، ایندیه قدر آدی چکیلن اولوسلارین(ملّتلرین) جمعیتلری نین سایی دؤلت طرفیندن رسماً اعلان اولماییبدیر. بونا باخمایاراق، بوتون تورکلرین یاشادیغی اراضی نین وسعتی نی، تورک دیللی شهر، کند و قصبه لرین سایینی، هابئله دولایی یوللارلا اعلان اولموش بعضی احصائیه لر نظره آلیناراق (مثلا تهراندا «همشهری» و «ابرار» قزئته لری کئچمیشده یازمیشدیلار تهراندا یاشایان اهالی نین هر ۱۰ نفردن۶/۵ الی ۷ نفری تورک دور. یعنی اگر تهران اهالیسی ۱۵ میلیون نفر اولسا، ساده بیر حسابلا بیلمک اولار تهراندا ۹/۵ میلیون نفرتورک یاشاییر) تخمین ووُرولور بوتون ایران تورکلری نین سایی ۴۰-۴۲ میلیون نفر دیر!

بو ۴۰-۴۲ میلیون نفر ایران تورکلری گئچمیش یوز ایلده اؤز ملّی – مدنی و کولتورل (فرهنگی) حقلریندن و دولاییسیلا اقتصادی حقلریندن محروم ائدیلیبلر.

حاکم فارس شووونیستی قوه لر چالیشیبلار تورکلری، فارس ملتی نفعینه آسیمیله ائتسینلر. بو تضییقلر و غیر انسانی سیاستلر سبب اولوبدور، گئچمیش یوز ایلده بیر چوخ ضعیف و ضعیف النفس تورکلر اؤز هویت و کیملیکلرینی ایتیریب، فارسلاشسینلار. بو غیر انسانی تحمیلاتا باخمایاراق، تورکلر اؤز دیل و کولتورَل(فرهنگی) اصالتلری نین گوجونه هله ده بیرلیکده ایران اهالی سی نین اکثریتینی تشکیل ائدیرلر.
بو گون همن اصالت اساسیندا تورکلر ایچره بیر جدی اویانیش یارانیبدیر. بو اویانیش او قدر گوجلو دور کی، بعضی دیلینی ایتیرمیش تورکلر، چالیشیرلار یئنیدن اؤز اصیل کیملیکلرینه دؤنوب قاییتسینلار.

البته طبیعی اولاراق بو اویانیشین کیفیتی و سویّه سی ایران تورک ملّتلری آراسیندا آز- چوخ فرقلی دیر و شدت و ضعفی واردیر. هر حالدا بوتون تورکلر ایچره ملی بیر اویانیش واردیر و ملی هویت و ملی آزادلیق اوغروندا چالیشیرلار.

منجه ایراندا یاشایان هر تورک ملتی بیرینجی نؤبه ده اؤز وارلیغینی قوروماغا چالیشسا دا امکان چرچیوه سینده سایر ایران تورک ملّتلرینه، الیندن گلدیگی قدر یاردیمچی و کؤمکچی اولمالیدیر. البته بونو دا نظره آلمالیییق کی، هر تورک ملتی نین اویانیشی و اؤز ملی حقلرینی مدافعه ائتمه سی، ایسته ر- ایسته مز سایر ایراندا یاشایان تورک ملتلری نین اویانیشینا و ملی حقلری نین قورونماسینا مدد وئره بیله جکدیر. آنجاق بیر آتالار سؤز واردیر، دئییر « سوسوز قویویا سو تؤکمک له سولو اولماز، سو گرک قویونون اؤزوندن اولسون » شوکورلر اولسون بو گون ایراندا یاشایان تورکلرین هامیسیندا ملی کیملیک اوغروندا اویانیش واردیر. و هر تورک ملتی باشقا ایران تورک ملتلرینه آز- چوخ مثبت کؤمگی یئتیشیر!

بو آرادا و سون ایللرده، ایران تورک ملتلری نین ملی حرکتلری نین گوجلنمه سییله یاناشی بیر سیرا آد، بعضا ده اصیل و اسکی تورکجه آدلار آلتیندا، اینتئرنئت و مجازی فضادا یازیب چالیشانلار «قوندارما تورکچو » میدانا گلمیشدیر. بو «قوندارما تورکچولر» اؤزلریندن یئنی «تورک ائلی» آدینی قونداراق، ایراندا یاشایان تورک ملتلرینین ملی وطنلرینی و ملی هویتلرینی کؤلگه یه سالماغا چالیشیرلار. چالیشیرلار تورکلری قارانلیق و مبهم بیر وطن، هویت و کیملیگه دوغرو هدایت ائدیب، ایراندا یاشایان تورکلر ایچره ائلیناسیون پروسه سینی ده گوجلندیرسینلر.

بو خلق الساعه «تورک ائلی» آدی، ایراندا یاشایان تورک ملتلری نین تاریخی و ملی وطنلری نین آدینی سلب ائدیر و سعی ائدیر تورکلر اؤز وطنلرینده غریبلیگه اوغراتسینلار. اصلینده «قوندارما تورکچولر» «تورک ائلی» تئوریسی ایله چالیشیرلار ایراندا یاشایان تورکلری بیر داها شدتله آسیمیله اولماغا دوغرو آپارسینلار.

بو قوندارما تورکچولر و عملده « تورک دوشمنی » اولان و «تورک ائلی» تئوریسینی قونداران نفوذی عنصرلرین هئچ بیری، حقیقی بیر شخص کیمی تانینمیرلار. کیملیکلری تورک ملتینه بللی دئییل! کیمسه اونلاری تانیمیر. اونلار نه ایرانین ایچینده تانینیرلار نه ده ایرانین ائشیگینده !

البته ممکن دور بعضی احساساتی آداملار بو ظاهری خوش، باطنی چیرکین تئوری نین آردینا دوشوب « دؤش ووُرسونلار». بورادا مقصد «تورک ائلی» تئوریسینی یارادیب، اورتایا آتان، اصلی عامللردیر.

یوخاریدا اشاره اولدوغو کیمی ایراندا خوراسان تورک ملتی، تورکمن ملتی، قاشقای تورک ملتی، خلج تورک ملتی، آذربایجان تورک ملتی و… یاشاییرلار. بو تورک اولوسلاری(ملتلری) نین هربیری نین اؤزونه گؤره کامل و مستقل ملی بیر کیملیگی واردیر. و البته عینی حالدا بو تورک ملتلری بیر چوخ اورتاق و مشترک اؤزللیکلره ده صاحب دیرلر. منجه بو ملتلر اؤز ملی کیملیکلرینی قورویاراق، گئج- تئز برابر و مساوی حقوق اساسیندا بیرلیگه دوغرو حرکت ائده جکلر! نئجه کی حال حاضرده ده بیر- بیرلرینی ان آزی معنوی اولاراق حمایت ائدیرلر. بورادا بوتون تورک میلتچیلره واجب دیر آییقلیق ایله بو «قوندارما تورکچولرین» گؤز آلتینا آلیب، وقتی-وقتینده اونلارین تشبثلرینی تأثیردن سالسینلار! بونودا بیلمه لیییک بونلارین بیرینجی هدف و آماجی ایران تورکلری نین ملی حرکتلری نین گوجونو آزالتسینلار ویا انحرافا چکیب اصلی یولدان آزدیرسینلار! هرحالدا هامیمیز آییق اولمالیییق!

بیشتر بخوانید

۲۷ آذر ؛ یکصدمین سالگرد جنگ بزرگ لکستان و مقاومت قهرمانانه مردم سلماس/ دکتر توحید ملک زاده

  از اوایل سال ۱۲۹۸ شمسی اکراد سیمیتقو حملات خود را شدت بخشیده و راه …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *